एजेन्सी । भारत र वेस्ट इन्डिजबीचको टेष्ट सिरिजको दोस्रो खेल कीर्तिमानी रह्यो । यो दुई टोलीबीचको १००औँ टेस्ट म्याच पनि थियो । यो खेलमा कुल ६ वटा कीर्तिमान तोडिएका थिए जसमध्ये ५ विराट कोहलीले र एक रोहित शर्माले बनाएका थिए ।
१. कोहली ५०० अन्तर्राष्ट्रिय खेल खेल्ने १० औं खेलाडी बने
भारतका ब्याट्सम्यान विराट कोहलीले वेस्ट इन्डिजविरुद्धको टेष्ट खेल सुरु हुनेबित्तिकै अनौठो उपलब्धि हासिल गरेका छन् । तीनवटै ढाँचामा ५०० अन्तर्राष्ट्रिय खेल खेल्ने उनी विश्वकै १०औँ खेलाडी बनेका छन् ।
१११ टेस्ट बाहेक कोहलीले २७४ एकदिवसीय र ११५ टी–२० खेलेका छन् । ३४ वर्षीय विराट अघि ६ ब्याट्सम्यान र ३ अलराउन्डरले मात्र ५०० भन्दा बढी अन्तर्राष्ट्रिय खेल खेल्न पाएका थिए ।
२. कोहली ५०० औं अन्तर्राष्ट्रिय खेलमा शतक बनाउने पहिलो क्रिकेटर
कोहली आफ्नो करियरको ५०० औं खेलमा शतक बनाउने विश्वकै पहिलो क्रिकेटर बनेका छन् । उनले १२१ रनको इनिङ खेले । यति मात्र होइन, कोहली ५ सयौं खेलमा सर्वाधिक रन बनाउने खेलाडी पनि बने । उनीअघि ९ खेलाडीले ५ सय खेल खेलेर कीर्तिमान बनाउन सके पनि ५ सय खेलमा अर्धशतक बनाउन सकेनन् । कोहलीअघि कुमार संगकाराले ५ सयौं खेलमा सर्वाधिक ४८ रन बनाएका थिए । श्रीलंकाका ब्याट्सम्यानले मार्च २०१३ मा बंगलादेशविरुद्धको एकदिवसीय खेलमा यो इनिङ खेलेका थिए ।
३. ५ सय खेलमा सर्वाधिक शतक, सचिनलाई पछि पारे
कोहली ५०० अन्तर्राष्ट्रिय खेलमा सर्वाधिक शतक बनाउने ब्याट्सम्यान बने । उनले सचिन तेन्दुलकरको कीर्तिमान तोडे । कोहलीले आफ्नो करियरको ७६ औं शतक प्रहार गरेका हुन् । सचिन तेन्दुलकरले ५ सय खेलसम्म ७५ शतक बनाएका थिए । अन्तर्राष्ट्रिय क्रिकेटमा विराटभन्दा माथि सचिन तेन्दुलकर (१०० शतक)ले मात्र बढी शतक बनाएका छन् । यसका लागि उनले ६६४ अन्तर्राष्ट्रिय खेल खेलेका छन् ।
४. विराट अन्तर्राष्ट्रिय क्रिकेटको शीर्ष ५ सर्वाधिक रन बनाउनेको सूचीमा परे
यस टेस्टको पहिलो दिन विराट कोहली ८७ रन बनाएर अविजित फर्किएका थिए । यस दिन कोहलीले २५,५४८ औं रन बनाए । योसँगै उनी अन्तर्राष्ट्रिय क्रिकेटमा सर्वाधिक रन बनाउने ब्याट्सम्यानमध्ये ५ नम्बरमा परेका छन् । कोहलीले दक्षिण अफ्रिकाका अनुभवी अलराउन्डर ज्याक कालिसलाई पछि पारेका छन् । कालिसले ५१९ खेलमा २५ हजार ५३४ रन बनाएका छन् ।
कोहलीभन्दा अगाडि श्रीलंकाका महेला जयवर्धने ६५२ खेलमा २५ हजार ९५७ रन बनाएर चौथो नम्बरमा छन् । सबैभन्दा धेरै रन बनाउने कीर्तिमान सचिन तेन्दुलकरको नाममा छ, उनले ३४ हजार ३५७ रन बनाएका छन् ।
५. वेस्ट इन्डिज विरुद्ध १२ औं अन्तर्राष्ट्रिय शतक, कालिसको बराबरी
विराट कोहलीले वेस्ट इन्डिजविरुद्ध शतक प्रहार गरी कीर्तिमान बनाएका छन् । विराटले इन्डिजविरुद्ध तीनवटै ढाँचामा आफ्नो १२औँ अन्तर्राष्ट्रिय शतक बनाए र दक्षिण अफ्रिकाका महान अलराउन्डर ज्याक कालिसको कीर्तिमान बराबरी गरे । अन्तर्राष्ट्रिय क्रिकेटमा वेस्ट इन्डिजविरुद्ध सर्वाधिक शतक प्रहार गर्ने कीर्तिमान सुनिल गावस्करको नाममा छ । गावस्करले वेस्ट इन्डिजविरुद्ध १३ शतक प्रहार गरेका छन् ।
६. रोहित सबैभन्दा छिटो २००० टेस्ट रन बनाउने भारतीय ओपनर
पहिलो इनिङ्समा रोहित शर्माले टेस्ट क्रिकेटमा ओपनरका रुपमा २ हजार रन पुरा गरेका छन् । उनले ४० इनिङमा मात्रै यो स्थान हासिल गरेका हुन् । रोहितले सबैभन्दा कम इनिङ्स खेल्ने भारतीय ओपनर राहुल द्रविड र वीरेन्द्र सहवागको कीर्तिमान बराबरी गरेका छन् । दुवै ब्याट्सम्यानले ४०–४० इनिङ्समा ओपनिङ गर्दै २ हजार रन पूरा गरेका थिए ।
