एजेन्सी । अर्जेन्टिनी सुपरस्टार लियोनल मेसीको निर्णायक गोलमा इन्टर मियामी विजयी भएको छ ।
नेपाली समयानुसार शनिबार बिहान सम्पन्न खेलमा मियामीले लिग्स कप अन्तर्गत क्रुज अजुललाई २–१ गोलले पराजित गरेको हो ।
खेलको ४४ औं मिनेटमा रोबर्ट टेलरको गोलबाट मियामीले खेलमा सुरुवाती अग्रता बनाएको थियो । तर, ६५ औं मिनेटमा युरेल अन्टुनाले गोल गर्दै क्रुजलाई १–१ को बराबरीमा ल्याए ।
यता, वैकल्पिक खेलाडीको रुपमा ५४ औं मिनेटमा बेन्जामिन क्रेमास्चीको स्थानमा मैदान प्रवेश गरेका मेसीले ९०+४ मिनेटमा फ्रिकिकबाट सुन्दर गोल गर्दै टोलीलाई जित दिलाए ।
जितसँगै समूह जे मा रहेको मियामीले तीन अंक बटुलेको छ । यसै सिजन फ्रेन्च क्लब पेरिस सेन्ट जर्मेन छाडेर एमएलएस क्लब मियामी पुगेका मेसीको खेल हेर्न हजारौं दर्शकहरु डीआरभी पिएनके स्टेडियम पुगेका थिए ।
