काठमाडौँ । पोखरा अन्तराष्ट्रिय विमानस्थलमा पहिलो पटक अन्तराष्ट्रिय व्यावसायिक विमान अवतरण गरेको छ । चीनको छेन्दुबाट सिचुआन एयरलाइन्सको न्यारोबडी ए ३१९ जहाज बिहान ९ बजेर ६ मिनेटमा विमानस्थलमा अवतरण गरेको हो । विमानलाई वाटर क्यानन सल्युट दिइएको थियो ।
यही असार ८ र ९ गते पोखराको फेवातामा हुन लागेको नेपाल चाइना ड्रागन बोट रेस फेस्टिभलमा सहभागी हुने खेलाडीसहितका यात्रु लिएर सिचुआनको चार्टर्ड विमान अवतरण गरेको हो । चीन भ्रमणमा गएको राष्ट्रियसभाका अध्यक्ष गणेश प्रसाद तिमिल्सिना सहितको टोली पनि सोही विमानबाट फर्किएको छ । विमान बिहान ११ बजे काठमाडौं हुँदै चीन फर्किने छ । उक्त एयरलाइन्सले हाल काठमाडौँस्थित त्रिभुवन अन्तर्राष्ट्रिय विमानस्थलमा नियमित व्यावसायिक उडान गरिरहेको छ ।
नेपाल नागरिक उड्डयन प्राधिकरणले पोखरा विमानस्थलमा पनि विमानको नियमित व्यावसायिक उडानका लागि छलफल भइरहेको जनाएको छ । २०२३ जनवरी १ मा उद्घाटन भएको विमानस्थलमा सो दिन हिमालयन एयरलाइन्सले परीक्षण उडान गरेको थियो । विमानस्थल रु २२ अर्ब लगानीमा निर्माण भएको हो ।
