काठमाडौं । साविक विजेता मछिन्द्र एफसीले सहिद स्मारक ए डिभिजन लिगमा हिमालयन शेर्पालाई ३–१ गोलले पराजित गरेको छ ।
बुधबार त्रिपुरेश्वरस्थित दशरथ रंगशालमा भएको खेलमा मछिन्द्रका लागि आफिज ओलावाले दुई तथा विमल घर्ती मगरले एक गोल गरे । हिमालयन शेर्पाका पिस्टोने मुटम्बाले एक गोल फर्काए ।
मछिन्द्रका लागि विमल घर्ती मगरले २६औं मिनेटमा गोल गर्दै सुरुवाती अग्रता दिलाएका थिए । दोस्रो हाफमा ओलवालेले दुई गोल गरे । उनले ६८औं र ७७ औं मिनेटमा पेनाल्टीमार्फत गोल गरेका हुन् ।
हिमालयन शेर्पाका लागि पिस्टोने मुटम्बाले अन्तिम मिमनेटमा एक गोल फर्काए । खेलको अन्तिम दश मिनेट दुवै टोली दश खेलाडीमा समेटिएका थिए ।
मछिन्द्रका कप्तान तथा गोलकिपर विशाल श्रेष्ठले ८३औं मिनेटमा रातो कार्ड पाएका थिए । श्रेष्ठको यो करिअरकै पहिलो रातो कार्ड हो । यस्तै विपक्षी खेलाडीसँग झगडा गरेका हिमालयन शेर्पाका निशान लिम्बुले ८५औं मिनेटमा रातो कार्ड पाएका थिए ।
यो जितसँगै मछिन्द्रले यस सिजन दोस्रो स्थानमा रहेर लिग सकाउने पक्का भएको छ । २५ खेलबाट मछिन्द्रको ४२ अंक छ । मछिन्द्रभन्दा पछि रहेका नेपाल पुलिसको ३८ र जावालखेल युथ क्लबको ३७ अंक छ ।
अब लिगमा एक खेल मात्र बाँकी रहेकोले दुवै टोलीले मछिन्द्रलाई भेटाउने छैनन् ।
नवप्रवेशी चर्च ब्वाइज युनाइटेडले पहिलो सिजनमै लिग उपाधि जितिसकेको छ । यो हारपछि हिमालयन शेर्पाको २५ खेलबाट ३१ अंक छ ।
