काठमाडौँ । फुटबल क्लब एसी मिलानका फरवार्ड ज्लाटन इब्राहिमोभिचले खेल जीवनबाट सन्यास घोषणा गरेका छन् ।
४१ वर्षीय स्विडिस इब्राहिमोभिचले सिरी ए को अन्तिम खेलपछि सन्यास घोषणा गरेका हुन् । उनले यसअघि नै एसी मिलान छाड्ने घोषणा गरिसकेका थिए ।
‘मैले फुटबललाई गुडबाइ भनेको हुँ, तपाईंहरूलाई होइन,’ अन्तिम खेलपछि इब्राहोभिचले भने । पेरिस सेन्ट जर्मेन, म्यानचेस्टर युनाइटेड र दुवै मिलान क्लबबाट खेलेका उनले क्लब फुटबलमा ५११ गोल गरेका छन् । उनले नेरदल्याण्ड्स, इटाली, स्पेन र फ्रान्स गरी चार देशहरूमा लिग उपाधि जितेका छन् ।
सन् २०११ मा एसी मिलानबाट सिरी ए उपाधि जितेको इब्राहिमोभिच २०२० मा फेरि मिलान पुगेका थिए । जहाँ उनले २०२१ मा मिलानले लिग जित्दा उनी सदस्य थिए ।
उनले मिलानबाट आफूले धेरै माया पाएको भन्दै धन्यवाद व्यक्त गरे । इब्राहिमोभिचले १४ लिग उपाधिसहित करियरमा कुल ३४ ट्रफीहरु जितेका छन् । उनी ११ पटक बालोन डी’ओरका लागि मनोनीतभएका थिए । उनले क्लब फुटबलमा जित्न नसकेको मुख्य ट्रफी भने च्याम्पियन्स लिग रह्यो । सन् २०१७ मा उनले म्यानचेस्टरयुनाइटेडबाट युरोपा लिग उपाधि जितेका थिए ।
इब्राहिमोभिचले स्वीडेनका लागि १२२ खेल खेल्दै सर्वाधिक ६२ गोल गरेका छन् ।
