काठमाडौं ।महिला टि२० आई शृखंलाअन्तर्गत तेस्रो खेलमा नेपालले मलेसियालाई २७ रनले पराजित गरेको छ । यो जितसँगै नेपालले ५ खेलको शृंखलामा २–१ ले अग्रता लिएको छ ।
नेपालले जितको लागि दिएको १ सय ११ रनको लक्ष्य पछ्याएको मलेसियाले २० ओभरमा ४ विकेट गुमाउँदै ८३ रन मात्रै बनायो । मलेसियाको लागि माहिराले सर्वाधिक ४४ रन योगदान दिईन् । यस्तै, विनीफर्डले २० रन जोड्दा मलेसियाका अन्य ब्याटरले दोहोरो अंकमा रन बनाउन सकेनन् ।
नेपालको तर्फबाट बलिङमा उत्रेका कविता कुँवर, सिता राना मगर र इन्दु वर्माले समान एक विकेट लिए ।
मलेसियाको बांगीस्थित युएसडी युकेएम ओभलमा टस हारेर पहिले ब्याटिङ गरेको नेपालले निर्धारित २० ओभरमा पाँच विकेट गुमाएर ११० रन बनाएको थियो ।
नेपालको लागि कप्तान रुविना क्षेत्री बेलबासेले सर्वाधिक २७ रन बनाएकी थिईन । उनले १५ बलमा ३ चौका र १ छक्का प्रहार गरिन् । यस्तै ज्योती पाण्डेले २३ रन बनाउदा सीता राना मगरले २१ र इन्दु बर्माले २० रन बनाएकी थिईन । कविता कुँवर २ रनमा आउट हुदा विन्दु रावल ३ र कविता जोशी १ रनमा अविजित रहेका थिए ।
बलिङतर्फ मलेसियाकी निक नुर अतिएलाले २ तथा आसया इलिसा र विनफ्रेड अन्नेले समान एक विकेट लिएकी थिईन् ।
पहिलो खेलमा ५ विकेटले पराजित भएको नेपालले दोस्रो खेलमा ७ विकेटको शानदार जित निकालेको थियो । पाँच खेलको शृंखलामा नेपालले अब चौथो र पाँचौं खेल शनिबार र आईतबार खेल्नेछन् । शृंखला जित्न नेपाललई अब एक जित पर्याप्त हुनेछ ।
