काठमाडौँ । साताको पहिलो कारोबारको दिन आइतबार शेयर बजार मापक नेप्से परिसूचक १०० अंक भन्दाबढीले गिरावट भएको छ ।
एक हप्तादेखि निरन्तर रुपमा घट्दै आएको नेप्से परिसूचक आइतबार १०१.२४ अंकले घटेर २ हजार ७००.३२ विन्दुमा ओरालो लागेको छ । त्यस्तै, सेन्सेटिभ इण्डेक्स १५.६२ अंक घटेको छ भने फ्लोट इण्डेक्स ६.९४ अंक र सेन्सेटिभ फ्लोट इण्डेक्स ५.२६ अंकले घटेको छ ।
बंैकिङ प्रणालीमा लगानीयोग्य रकम तरलता अभावका कारण बैंक तथा वित्तीय संस्थाले व्याजदर वृद्धि गर्ने निर्णय गरेसँगै आइतबार नेप्से परिसूचक उच्च अंकले गिरावट आएको छ ।
आइतबार कारोबारमा आएका २२७ कम्पनीको १ करोड १६ लाख ६१ हजार ६३९ कित्ता शेयर ५ अर्ब ९७ करोड ७२ लाख १४ हजार ७३१ रुपैयाँ बराबरको शेयर खरिदबिक्री भएको छ ।
आइतबार १३ वटै उपसमूहको परिसूचक राताम्मे भएको छ । जसमध्ये जलविद्युत उपसमूहको परिसूचक सबैभन्दा बढी ५.४७ प्रतिशतले गिरावट आएको छ । लगानी उपसमूहको परिसूचक ५.०३ प्रतिशत र विकास बैंक, वित्त, उत्पादन तथा प्रशोधन र निर्जीवन बीमा उपसमूहको परिसूचक ४ प्रतिशतभन्दा बढी गिरावट आएको छ ।
कारोबारमा आएका २२७ कम्पनीमध्ये आइतबार २२१ कम्पनीको शेयरमूल्यमा उच्च अंकले गिरावट आएको छ । अपर तामाकोशीको शेयरमूल्य सबैभन्दा बढी ८.३७ प्रतिशत घटेको छ । नारायणी डेभलपमेन्ट बैंकको शेयरमूल्य ८.२६ प्रतिशत घटेको छ भने शिवश्री हाइड्रोपावर, विन नेपाल लघुवित्त र पञ्चकन्या माइ हाइड्रोपावरको शेयरमूल्य ७ प्रतिशतभन्दा बढीले घटेको छ ।
कारोबार रकमका आधारमा ३२ करोड ८४ लाख रुपैयाँ बराबरको शेयर खरिदबिक्री गरेर अपर तामाकोशी शीर्ष स्थानमा रहेको छ । अरुण हाइड्रोपावर, नेपाल इन्फ्रास्ट्रक्चर र अपि पावरको २१ करोडभन्दा बढीको शेयर खरिदबिक्री भएको छ ।
