एजेन्सी । स्पेनिस फुटबल लिग ला लिगाको उपाधि बार्सिलोनाले जितेको छ । गएराति भएको खेलमा इस्पान्योललाई ४–२ गोलले हराउँदै बार्सिलोना चार खेल अगावै च्याम्पियन बनेको हो ।
इस्पान्योलको घरेलु मैदानमा बार्सिलोनालाई जित दिलाउन रोबर्ट लेवान्डोस्कीले दुई तथा अलेजान्ड्रो ब्लेड र जुलेस कोउन्डेले एक–एक गोल गरे । इस्पान्योलका जाभी पाउडो र जोसेलुले एक–एक गोल फर्काए ।
खेलको ११ औं मिनेटमा लेवान्डोस्कीले गोल गर्दै पाहुना टोली बार्सिलोनालाई सुरुवाती अग्रता दिलाएका थिए । २० औं मिनेटमा ब्लेडले गोल गर्दै बार्सिलोनाको अग्रता दोब्बर पारे । ४० औं मिनेटमा लेवान्डोस्कीले व्यक्तिगत दोस्रो तथा टोलीका लागि तेस्रो गोल गर्दा पहिलो हाफमै बार्सिलोना ३–० ले अघि बढ्यो ।
यस्तै, ५३ औं मिनेटमा कोउन्डेले गोल गर्दै बार्सिलोनालाई ४–० को अग्रता दिलाए । यता, ७३ औं मिनेटमा जाभी र ९०+२ मिनेटमा जोसेलुले गोल गरेपनि उनीहरुको गोल सान्त्वना गोल हुन पुग्यो ।
बार्सिलोनाको ८५ अंक छ । उ दोस्रो स्थानको रियल मड्रिडभन्दा १४ अंकले बढी छ ।
बार्सिलोनाको यो २७ औं ला लिगा उपाधि हो । १७ वर्ष बार्सिलोनमा खेलाडीका रुपमा बिताउँदै ७ ला लिगा उपाधि जितेका प्रशिक्षक जाभी हर्नान्डेजले पहिलोपटक प्रशिक्षण सम्हालेपछि ला लिगाको उपाधि जित्न सफल रहे ।
