एजेन्सी । च्याम्पियन्स लिग फुटबल अन्तर्गत आज मंगलबार मध्यरातमा युरोपका दुई महारथी क्लबबीच प्रतिस्पर्धा हुँदैछ ।
सेमिफाइनलको पहिलो लेगमा स्पेनिस क्लब रियल मड्रिड र इंग्लिस क्लब म्यान्चेस्टर सिटी आमनेसामने हुँदैछन् । यी दुईक्ल्बबीचको महाभिडन्त मध्यरात अर्थात् नेपाली समयानुसार पौने १ बजे सुरु हुनेछ ।
रियल मड्रिडले क्वाटरफाइनलमा चेल्सीलाई समग्रमा ४–० को नतिजाले पाखा लगाउँदै सेमिफाइनलमा स्थान बनाएको हो । यस्तै म्यान्चेस्टर सिटीले बायर्नलाई समग्रमा ४–१ ले पन्छाउँदै सेमिफाइनलको यात्रा तय गरेको हो ।
गत सिजन च्याम्पियन्स लिगको सेमिफाइनलमै सिटी रियल मड्रिडसँग समग्रमा ६–५ ले पराजित भएको थियो । यद्यपि, सिटीका मुख्य प्रशिक्षक पेप ग्वार्डिओलाले मंगलबारको खेललाई बदलाको रुपमा नलिने बताएका छन् ।
उनले रियलविरुद्धको खेललाई बदलाको रुपमा लिएको खण्डमा त्यो सबैभन्दा ठुलो गल्ती हुने प्रतिक्रिया दिएका छन् । यस्तै, रियलका प्रशिक्षक कार्लो एन्सेलोटीले आफ्नो टिम सिटीलाई रोक्न र आफ्नो पक्षमा नतिजा निकाल्न सक्षम रहेको बताएका छन् ।
गत वर्ष फाइनलमा रियलले लिभरपुललाई १–० गोलले हराउँदै उपाधि जितेको थियो । रियल र सिटीबीचको सेमिफाइनलको दोस्रो लेग मे १८ मा सिटीको घरेलु मैदान इतिहाडमा हुनेछ । दुबै टिम आजको खेलमा जित निकाल्दै दोस्रो लेगमा सहज हुनेगरि नतिजाको अपेक्षामा रहनेछन् ।
