काठमाडौँ । प्रतिनिधि सभा सदस्य आरजु राणा देउवाले आफूमाथि अनेक लान्छना लगाइने गरेको बताएकी छन् ।
आइतबारको प्रतिनिधिसभा बैठकमा बोल्दै नेपाली कांग्रेस सभापति शेरबहादुर देउवापत्नी आरजुले आफू नभएको दिनमा समेत संसद्मा आफ्ना नाम इंगित गरेर प्रश्न उठेको गुनासो गरेकी हुन् ।
उनले भनिन् ‘नारीले आफ्नो हैसियतमा राजनीति गरेको यो देशमा सह्य हुँदो रहेनछ । मिसोजनी भन्ने एउटा शब्दावली छ । जसको अर्थ हुन्छ – पुरुषले भनेको ठाउँमा मात्रै नारी बस्नुपर्ने हुन्छ । पब्लिक लाइफमा आएपछि पुरुषलाई असह्य हुने गर्छ । जसले जति क्रिटिसाइज गरेपनि बिराएको छैन, डराउँदिनँ ।’
यस्तै, उनले आफ्नो सम्पत्ति विवरण राज्यसँग सुरक्षित रहेको दाबी समेत गर्दै भनिन्, ‘हामीले सम्पत्ति विवरण बुझाउने गरेका छौँ । मेरो श्रीमान् पाँच पटक प्रधानमन्त्री भइसक्नुभएको छ । मेरो लगायत हाम्रो सम्पत्ति विवरण नेपाल सरकारसँग सुरक्षित छ । हामी सबै सांसदको सम्पत्ति विवरण मागेर वेबसाइटमा राखियोस् । जनताले थाहा पाउने गरी कसले कति सम्पत्ति कमाएको छ त्यो सबै राखियोस् ।’
