काठमाडौँ । नक्कली भुटानी शरणार्थी बनाएर अमेरिका पठाउने गिरोहमा नेकपा एमालेका नेताहरुको संलग्नता देखिँदै गएपछि फेक अडियो रेकर्ड गराएर कांग्रेसका केही नेताहरुलाई बदनाम गराउने अभियान सुरु गरिएको कांग्रेसले निष्कर्ष निकालेको छ । नेकपा एमाले भक्तपुरका नेता महेश बस्नेतले एउटा यस्तै फेक अडियो सार्वजनिक गरेपछि कांग्रेसले यसमा कांग्रेसका खास नेताको बदनाम गर्न प्रपञ्च गरिएको बताएको हो ।
उक्त अडियोमा कसले कोसँग कुरा गरेको हो भन्ने नै नखुलाई कांग्रेस केन्द्रीय सदस्य डा आरजु राणा देउवा र मञ्जु खाँडलाई जोडिएको छ । प्रहरी विषेश ब्युरोले दिएको रिपोर्टअनुसार हालै सार्वजनिक गरिएको अडियो केही दिनअघि रेकर्ड गरिएको फेक अडियो हो ।
उक्त अडियो कसले रकर्ड गराएको हो भन्ने विषयमा प्रहरीले अनुसन्धान थालेको छ। उक्त फेक अडियोमा अमूक दुई जना व्यक्तिबीच कुराकानी भएको र त्यहाँ डा आरजु र मञ्जुको नाम मुछिएको छ । प्रहरीको प्रारम्भिक अनुसन्धानले नेकपा एमालेका सचिव टोपबहादुर रायमाझीलगायतका नेताहरु विरुद्ध पक्राउ पुर्जी जारी भएपछि कांग्रेस नेताहरुलाई पनि बदनाम गराउने उद्देश्यले यस्तो फेक सुटिङ गराएर फोन रेकर्ड गरिएको हो ।
“डा आरजु राणा र मञ्जु खाँडलाई मुछेर सार्वजनिक गरिएको अडियो केहीदिन अघि मात्रै रेकर्ड गरेको भेटिएको छ”, अनुसन्धानमा संलग्न एक प्रहरी अधिकृतले भने, “कसले रेकर्ड गराएको हो र त्यो आवाज कसको हो भन्ने हामी पत्ता लगाएर कारबाहीको दायरामा ल्याउँछौँ।” अडियोमा मञ्जु खाँडलाई अनामनगरको घरमा गएर ६ करोड दिएको भनिएको छ, जबकी मञ्जु खाँड कोभिड सुरु भएदेखि विगत ४ वर्षदेखि नै चावहिलमा बस्दै आएकी छन् ।
यही फेक अडियोलाई लिएर केही सञ्चारमाध्यामहरुले समाचार बनाएकोमा पनि आपत्ति जनाइएको छ । “समाचार लेख्नुअघि त्यसको भेरिफिकेशन गर्नुपर्ने सञ्चा माध्यमको आरधारभूत दायित्व हो’, ती प्रहरी अधिकृतले भने, “जसले जे सार्वजनिक गर्यो त्यसैलाई समाचार बनाउने प्रपोकाण्डबाट सञ्चार क्षेत्र पनि चनाखो हुनुपर्छ । यसले सञ्चार जगत्कै विश्वसनीयता हराउँछ।
