काठमाडौँ । काठमाडौँ महानगरपालिकाले महानगरभित्रका विद्यालयको नाम र चिन्हका बारेमा एकरुपता ल्याउने भएको छ ।
महानगरपालिका विद्यालय शिक्षा व्यवस्थापन नियमावली, २०७४ को नियम ६९, ७० तथा सोही नियमावलीको ७० को उपनियम १ र २ ले विद्यालयको नाम र चिन्हका बारेमा एकरुपता ल्याउन खोजेको महानगरपालिकाका मेयर बालेन्द्र शाह (बालेन)ले जानकारी दिए ।
मेयर शाहका अनुसार विद्यालयको चिन्ह षट्कोणको हुनेछ । विद्यालय व्यवस्थापन समितिले निर्णय गरी सो षट्कोणको बीचमा आफ्नो विद्यालयको छुट्टै चिन्ह राख्न सक्नेछ ।
यस्तै, नियमको पालना गर्दै विद्यालयको चिन्ह र नाममा एकरुपता ल्याएर मौलिक र मापदण्ड अनुरुप रहन आग्रह गरेको बताउँदै मेयर शाहले नियमको पालना नभएको खण्डमा कानुनी कारबाही गर्न महानगर बाध्य हुने समेत चेतावनी दिएका छन् ।
