काठमाडाैँ । नवलपरासी (बर्दघाट सुस्ता पूर्व)को कावासोती नगरपालिका–१६, पत्थरखोलास्थित पुलनजिक माइक्रोबस अनियन्त्रित भई पल्टिँदा ६ जना घाइते भएका छन्।
नारायणगढबाट बुटवलतर्फ जाँदै गरेको लु.प्र. ०१–००१ ज १००० नम्बरको माइक्रोबस (ईभी हाइस) अगाडिको बायाँतर्फको टायर पन्चर भएपछि अनियन्त्रित भएर पल्टिएको प्रहरीले जनाएको छ। दुर्घटनाका बेला माइक्रोबसमा चालक र सहचालकसहित सात जना सवार थिए।
दुर्घटनामा कावासोती नगरपालिका–८ का २७ वर्षीय चालक होरामणी महतो, कावासोती–३ का ७४ वर्षीय सुरेश कुँवर र उनकी ६२ वर्षीया श्रीमती लालकुमारी कुँवर, सुर्खेत वीरेन्द्रनगर नगरपालिका–२ का ४५ वर्षीय धनराज बुढा, वीरेन्द्रनगर–६ का ३६ वर्षीय बलबहादुर बुढा तथा नवलपरासी (बर्दघाट सुस्ता पश्चिम) सरावल गाउँपालिका–३ का ५५ वर्षीय बिधासागर लोना चमार घाइते भएका छन्।
घाइते चालक महतोको कालीगण्डकी अस्पतालमा उपचारपछि प्रहरीले नियन्त्रणमा लिएको जनाएको छ। अन्य घाइतेहरूको मध्यबिन्दु अस्पतालमा उपचार भइरहेको छ।
दुर्घटनाबारे थप अनुसन्धान भइरहेको प्रहरीले जनाएको छ।
