काठमाडाैँ। पाल्पाको तिनाउ गाउँपालिका–४ चिउरीडाँडामा पिकअप जिप दुर्घटना हुँदा १० जना घाइते भएका छन्।
सोमबार बिहान करिब ७ बजे लु १ ज २२३७ नम्बरको मुस्ताङ पिकअप जिप अनियन्त्रित भई सडकबाट करिब ११० मिटर तल खसेर दुर्घटना भएको हो।
दुर्घटनामा जिपमा सवार चालकसहित १० जना घाइते भएका छन्। घाइतेमध्ये एक जनाको अवस्था गम्भीर रहेको प्रहरीले जनाएको छ। अन्य नौ जनाको अवस्था मध्यम रहेको छ।
दुर्घटनापछि घाइतेहरूको उद्धार गरी उपचारका लागि लुम्बिनी प्रादेशिक अस्पताल लगिएको छ। उनीहरूको उपचार भइरहेको छ।
दुर्घटना के कारणले भएको हो भन्नेबारे प्रहरीले थप अनुसन्धान गरिरहेको जनाएको छ।
