काठमाडौँ।यमनको विद्रोही समूह हुथीले लाल सागर (रेड सी) स्थित मोचा बन्दरगाह र पश्चिमी तटीय क्षेत्रका सरकारी नियन्त्रित इलाकाहरूमा आईतवार श्रृंखलावद्ध मिसाइल तथा ड्रोन आक्रमण गरेको छ ।
उक्त आक्रमणमा परी कम्तीमा ८ जनाको मृत्यु भएको छ भने ३२ जना घाइते भएका छन् । स्थानीय चिकित्सा स्रोतकाअनुसार मृत्यु हुनेमा चार सर्वसाधारण र चार सरकारी सेना रहेका छन् ।
दक्षिण–पश्चिमी ताइज प्रान्तमा पर्ने रणनीतिक मोचा बन्दरगाह र आसपासका क्षेत्रमा हुथी समूहले भीषण आक्रमण गर्दा ठूलो मानवीय र भौतिक क्षति भएको हो । मोचा बन्दरगाहका निर्देशक अब्दुल मलिक अल–शराबीले हुथी समूहले दर्जनौँ ड्रोन प्रहार गरेको जानकारी दिए ।
उनकाअनुसार करिव २५ वटा ड्रोनले आर्थिक प्रतिष्ठान, कर्मचारी आवास र भन्सारको गोदाममा प्रत्यक्ष प्रहार गरेका थिए । यमनको यातायात मन्त्रालयले ब्यालिस्टिक मिसाइल र ड्रोन प्रहारबाट बन्दरगाहको पूर्वाधारमा गम्भीर क्षति पुगेको जनाएको छ ।
घटनापछि सरकारी नियन्त्रित क्षेत्रका बन्दरगाह, विमानस्थल र सीमा नाकाहरूमा सुरक्षा शतर्कता उच्च पारिएको र आपत्कालीन उपायहरू अवलम्बन गरिएको मन्त्रालयले उल्लेख गरेको छ ।
हुथी सैन्य प्रवक्ता याह्या सारियाले सामाजिक सञ्जालमार्फत उक्त आक्रमणको जिम्मेवारी लिएका छन् । उनले साउदी समर्थित सेनाको सैन्य भण्डार र केन्द्रहरूलाई लक्षित गरी ठूलो परिमाणमा ब्यालिस्टिक मिसाइल र ड्रोन प्रहार गरिएको दाबी गरे । साउदी नेतृत्वको सैन्य परिचालन र तटीय क्षेत्रमा भएका पछिल्ला आक्रमणको जवाफमा यो कारबाही गरिएको हुथी पक्षको तर्क छ ।
सोही दिन हुथी समूहले साउदी अरबको जाजानस्थित साउदी अराम्को रिफाइनरीमा पनि ड्रोन आक्रमण गरेको दाबी गरेको छ । साउदी ऊर्जा मन्त्रालयले रिफाइनरीको एक हिस्सामा लागेको आगो नियन्त्रणमा लिइएको र कुनै मानवीय क्षति नभएको पुष्टि गरेको छ ।
यमनमा सन् २०१४ देखि गृहयुद्ध जारी छ । हुथी विद्रोहीले राजधानी सानालगायत उत्तरी यमनको ठूलो हिस्सा कब्जा गरेपछि सन् २०१५ देखि साउदी नेतृत्वको गठबन्धनले अन्तर्राष्ट्रिय मान्यता प्राप्त सरकारको समर्थनमा सैन्य हस्तक्षेप गर्दै आएको छ ।
पछिल्लो समय हुथी समूह र साउदी अरबबीच तनाव पुनः चुलिएको छ, जसले गर्दा लाल सागरको जलमार्ग र तेल पूर्वाधारहरूमा आक्रमणका घटनाहरू बढेका छन् । सिन्ह्वा/न्युज एजेन्सी नेपाल
