काठमाडौँ। अमेरिकी राष्ट्रपति डोनाल्ड ट्रम्पले विल शार्फलाई राष्ट्रपतिको सहायक र ह्वाइट हाउस काउन्सिल (मुख्य कानूनी सल्लाहकार) नियुक्त गर्ने घोषणा गर्नुभएको छ ।
आगामी सेप्टेम्बर १ देखि लागू हुनेगरी ट्रम्पले आईतवार आफ्नो सामाजिक सञ्जाल ट्रुथ सोसलमार्फत सो जानकारी दिनुभएको हो ।
हाल ह्वाइट हाउसको स्टाफ सेक्रेटरीको जिम्मेवारी सम्हालिरहनुभएका शार्फले यसअघि नेसनल क्यापिटल प्लानिङ कमिसनको अध्यक्षका रूपमा समेत सेवा गरिसक्नुभएको छ ।
नियुक्तिको घोषणा गर्दै ट्रम्पले शार्फको कार्यक्षमताको प्रशंसा गर्नुभएको छ । शार्फसँग संघीय अभियोजक र निजी क्षेत्रमा अधिवक्ताका रूपमा काम गरेको लामो अनुभव छ ।
उनले दुईवटा संघीय पुनरावेदन अदालतका न्यायाधीशहरूको कानूनी सहयोगी (क्लर्क) का रूपमा समेत काम गर्नुभएको थियो ।
ट्रम्पकाअनुसार शार्फले बाइडेन प्रशासनको समयमा आफ्ना विरुद्ध चलाइएका विभिन्न कानुनी मुद्दाहरूमा सर्वोच्च अदालतसम्म उनको पक्षबाट प्रतिनिधित्व गर्नुभएको थियो ।
अमेरिकी सञ्चारमाध्यमहरूका अनुसार शार्फले ह्वाइट हाउसको ४० करोड डलर लागतको बलरुम परियोजना स्वीकृत गराउन महत्वपूर्ण भुमिका खेल्नुभएको थियो । यद्यपि, वासिङ्टन डिसीको संघीय पुनरावेदन अदालतले हालै उक्त परियोजनालाई गैरकानूनी ठहर गरेको छ र यो मुद्दा छिट्टै सर्वोच्च अदालत पुग्न सक्ने सम्भावना छ ।
शार्फले डेभिड वारिङ्टनको स्थान लिनेछन्, जो अब निजी क्षेत्रमा आवद्ध हुन लागेको ट्रम्पले उल्लेख गर्नुभएको छ । सिन्ह्वा/ न्युज एजेन्सी नेपाल
