काठमाडौँ । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आन्दोलनरत मिटरब्याज पीडितहरुको माग सम्बोधन गर्न सरकारसमक्ष आग्रह गर्नुभएको छ ।
मंगलबार प्रतिनिधिसभाको बैठकमा उहाँले मिटरब्याज पीडितहरुको माग सम्बोधन नगरे राप्रपा पनि सडक संघर्षमा जाने चेतावनी दिनुभयो । सोमबार काठमाडौँको शान्तिवाटिकामा प्रहरी र मिटरब्याज पीडितहरुबीच भएको झडपको भर्त्सना गर्दै उहाँले न्यायको माग गर्दै आएका मिटरब्षज पीडितहरुलाई सरकारले निर्मम ढंगले आक्रमण गरेको बताउनुभयो ।
“सरकारले मिटरब्याज पीडित र तराइमा आन्दोलनरत हरवाचरवाहरुको मागलाई समयमै सम्बोधन गरोस् । अन्यथा जिम्मेवार राजनीतिक पार्टीको नाताले राप्रपा उनीहरुको साथमा सडक संघर्षमा जाने समेत घोषणा गर्न चाहन्छु”, अध्यक्ष लिङ्देनले भन्नुभयो ।
गरिब र सर्वहारा वर्गको अधिनायकत्व स्थापना गर्ने सपना देखाएको पार्टी नेकपा (माओवादी केन्द्र)र उसको नेतृत्व प्रधानमन्त्री भएका बेला गरिब र निमुखाहरुमाथि बर्बर आक्रमण हुनु दुःखद रहेको उहाँको भनाइ थियो ।
