एजेन्सी । इंग्लिस प्रिमियर लिग फुटबल अन्तर्गत म्यान्चेस्टर सिटीले सहज जित निकालेको छ ।
शनिबार राति सम्पन्न खेलमा म्यान्चेस्टर सिटीले लेस्टर सिटीलाई ३–१ गोलले पराजित गरेको हो । घरेलु मैदानमा म्यान सिटीलाई जित दिलाउन एर्लिङ हालाण्डले दुई तथा जोन स्टोन्सले एक गोल गरे । लेस्टरका केलेची इहनाचोले एक गोल फर्काए ।
खेलको पाँचौं मिनेटमा नै जोन स्टोन्सको गोलबाट म्यान सिटीले सुरुवाती अग्रता बनाएको थियो । १३ औं मिनेटमा हालाण्डले पेनाल्टीमार्फत गोल गर्दै म्यान सिटीको अग्रता दोब्बर पारे ।
यस्तै, २५ औं मिनेटमा हालाण्डले व्यक्तिगत दोस्रो तथा टिमका लागि तेस्रो गोल गर्दा पहिलो हाफमै म्यान सिटी ३–० ले अगाडि रहेको थियो । दोस्रो हाफमा म्यान सिटीले थप गोल गरेन । उता, ७५ औं मिनेटमा इहनाचोले गोल गरेपनि लेस्टरको हार टार्न सकेनन् ।
जितसँगै म्यान सिटीले शीर्ष स्थानको आर्सनलसँग अंक दुरी घटाएको छ । आर्सनलको ३० खेलबाट ७३ अंक रहँदा समान खेलबाट सिटी ७० अंकका साथ दोस्रो स्थानमा छ । यता पराजित लेस्टर ३१ खेलबाट २५ अंकका साथ १९ औं स्थानमा रहँदै रेलिगेशनबाट उत्रिन संघर्षरत छ ।
