तनहुँ । तनहुँ क्षेत्र नं १ मा प्रतिनिधी सभा सदस्यका लागि नेकपा एमालेबाट उम्मेदवार रहेका सर्वेन्द्र खनालले जालझेलको राजनीति गर्न नजाने पनि देश र जनताको हितका लागि राजनीति गर्न जानेको बताएका छन् ।
बुधबार प्रेस चौतरी तनहुँद्वारा आयोजित पत्रकार सम्मेलनमा आफ्ना धारणा राख्दै खनालले सधैं देश र जनताको हितका लागि राजनीति गर्ने बताएका हुन् ।
उनले भने ‘धेरैले मलाई राजनीतिक पृष्ठभूमि छैन, राजनीति गर्न जानेको छैन भन्ने लाल्छना लगाउछन्, हो मैले छल र जालको राजनीति गर्न जान्दिनँ तर राष्ट्रिय हितका लागि राम्रोसँग राजनीति गर्न जानेको छु’ ।
आफुसँग ३० वर्ष राष्ट्र सेवकको रुपमा काम गरेको अनुभव रहेको बताउँदै देशको भ्रष्टाचार र बेथिती नियन्त्रण र न्युनिकरणमा महत्वपूर्ण योगदान गर्न सक्ने उनको भनाई छ ।
राजनीतिको लामो अनुभव नभएपनि मुलुकको कानुनी व्यवस्था र कार्यावन्यनका मामलामा नजिक रहेर काम गरेकाले सांसदको रुपमा प्रभावकारी काम गर्न सक्ने दाबि गर्दै सुरक्षालाई प्रमुख प्रथामिकता दिएर भ्रष्टाचारमा शुन्य सहनशिलता र पारदर्शीतालाई अग्रस्थानमा राख्ने प्रतिवद्धता व्यक्त गरे ।
‘मलाई कसैसँग रिस, राग छैन सबैसँग समन्वय गरेर जिल्लाको पूर्वाधार निर्माण र विकासका लागि काम गर्न चाहन्छु’ उनले भने । गत मंसिरको चुनावमा निर्वाचित रामचन्द्र पौडेल राष्ट्पतिमा निर्वाचित भएपछि रिक्त रहेको यस क्षेत्रमा बैशाख १० गते उपनिर्वाचन हुन लागेको हो ।
