काठमाडौँ । नेपाल उद्योग वाणिज्य महासंघका वरिष्ठ उपाध्यक्ष चन्द्र ढकालले वर्षौं पुरानो कालोबजारी ऐनलाई परिवर्तन गरी उपभोक्ता संरक्षण ऐनसँगै मिलाएर लैजानुपर्ने बताउनुभएको छ ।
विश्व उपभोक्ता अधिकार दिवसको अवसरमा बुधबार काठमाडौँस्थित राष्ट्रिय सभागृहमा आयोजित कार्यक्रममा उहाँले उपभोक्ता संरक्षण ऐन, २०७५ अनुसार उपभोक्ताको संरक्षण गरिएको भए पनि यसले उत्पादन र वितरणलाई केहीमात्रामा निरुत्साहित गरेको बताउनुभयो ।
मुलुकको संविधानले पनि उपभोक्ताको अधिकारलाई सुनिश्चित गरेको छ भन्दै वरिष्ठ उपाध्यक्ष ढकालले उपभोक्ताको हितलाई ध्यानमा राखे वस्तु र सेवा उपलब्ध गराउनु उत्पादक कम्पनी तथा आपूर्तिकर्ताहरुको जिम्मेबार भएको उल्लेख गर्नुभयो ।
निजी क्षेत्रको उत्पादन र वितरणबाट सरकारलाई राजश्व प्राप्त हुने भन्दै उहाँले गत वर्षको राजश्व र अहिलेको राजश्वको लक्ष्यलाई हेर्दा राजश्व असुली धेरै नै कम भएको उहाँको भनाइ थियो ।
नाजायज हिसाबले वस्तु र सेवाको सिन्डिकेट तथा गुणस्तरले समस्या भएको भन्दै कालोबजारी ऐन र उपभोक्ता संरक्षण ऐनलाई समायोजन गरेर लैजानुपर्ने उहाँले सुझाव दिनुभयो ।
अबको एक महिनापछि आफू नेपाल उद्योग वाणिज्य महासंघको अध्यक्षको जिम्मेबारीमा पुग्ने जानकारी दिँदै वरिष्ठ उपाध्यक्ष ढकालले महासंघको आचारसंहितालाई पहिलो प्राथमिकता दिएर काम गर्ने प्रतिबद्धता व्यक्त गर्नुभयो ।
