काठमाडौं । पूर्वकप्तान सन्दीप लामिछानेले पाटन उच्च अदालतले गरेको फैसलाविरुद्ध सर्वोच्च अदालतमा पुनरावेदन गरेका छन् । राष्ट्रिय टीमबाट विदेशमा खेल्न पाउनुपर्ने माग गर्दै सन्दीपले उच्च अदालतकोफैसलाविरुद्ध पुनरावेदन गरेका हुन् ।
बलात्कारको अभियोग लागेका सन्दीप गत २९ पुषमा २० लाख धरौटीमा केन्द्रिय कारागारबाट रिहा भएका थिए । जिल्ला अदालतको थुनामै बसेर मुद्दा लड्नुपर्ने आदेश बदर गर्दै उच्च अदालतले उनलाई धरौटीमा थुनामुक्त गर्न आदेश दिएको थियो । तर, उनलार्ई विदेश जान भने रोक लगाएको छ । उच्च अदालतको सोहि फैसलाविरुद्ध सन्दीपले एक साताअघि सर्वोच्चमा पुनरावेदन गरेका हुन् ।
सन्दीपले गरेको पुनरावेदनमा फागुन १२ गतेलाई पेसी तोकिएको बताईएको छ ।
नेपाली क्रिकेट टीम आगामी १३ गते यूएई र पपुवान्यूगिनीविरुद्धको म्याच खेल्न दुबई जाँदैछ । अदालतले विदेश जान रोक लगाएकाले सन्दीपलाई टीममा नपर्नसक्छन् । तर, सर्वोच्चको १२ गतेको पेसीले उक्त रोक फुकुवा गरिदियो भने सन्दीप यूएई जान सक्छन् ।
हाल घरेलु मैदानमा जारी त्रिकोणात्मक श्रृंखलामा सन्दीपले उत्कृष्ट प्रदर्शन गरिरहेका छन् ।
