काठमाडौँ । निर्वाचन आयोगले चितवन क्षेत्र नम्बर २ मा हुने उपनिर्वाचनका लागि दल दर्ता गर्न आह्वान गरेको छ । वैशाख १० मा सो क्षेत्रमा उपनिर्वाचन हुँदैछ । यही फागुन १० गतेदेखि १६ गतेसम्म दल दर्ता गर्न सकिने आयोगले जनाएको छ । यद्यपि, नयाँ खुल्ने दलहरूले भने उपनिर्वाचनमा भाग लिन पाउने छैनन् ।
आयोगका अनुसार २०७९ फागुन ५ गतेसम्म निर्वाचन आयोगमा दर्ता भएका राजनीतिक दलले उपचुनावमा भाग लिन फागुन १६ गतेसम्म दल दर्ता निवेदन आयोगमा पठाइसक्नुपर्नेछ । राजनीतिक दलसम्बन्धी नियमावली २०७४ को अनुसूची १२ बमोजिमको ढाँचामा निर्वाचन आयोगको कार्यालयमा दल दर्ता निवेदन दिनुपर्ने आयोगले जनाएको छ ।
गत मंसिर ४ मा भएको चुनावमा चितवन क्षेत्र नम्बर २ बाट राष्ट्रिय स्वतन्त्र पार्टी (रास्वपा)का उम्मेदवार रवि लामिछाने निर्वाचित भएका थिए । सर्वोच्च अदालतले नागरिकताको विषयलाई लिएर उनको उम्मेदवारी नै बदर गर्दै पद खारेज गरिदिएपछि यहाँ उपचुनाव हुन लागेको हो ।
उपनिर्वाचनका लागि चैत २० गते उम्मेदवारको मनोनयन दर्ता गर्ने तालिका छ । यस्तै, चैत २१ गते उम्मेदवारको विरोधमा उजुरी, चैत २२ गते मनोनयन पत्र र उजुरीउपर जाँचबुझ गरी निर्णय दिने तथा उम्मेदवारको नामावली प्रकाशन गर्ने तालिका रहेको आयोगले जनाएको छ । चैत २३ गते उम्मेदवारलाई निर्वाचन चिन्ह प्रदान गरिनेछ ।
