काठमाडौँ । नागरिक उन्मुक्ति पार्टी (नाउपा) का सांसद गंगाराम चौधरीले लाल आयोगको प्रतिवेदन सार्वजनिक गर्न संसद्समक्ष आग्रह गर्नुभएको छ । प्रतिनिधिसभाको बुधबारको बैठकमा उहाँले लाल आयोगको प्रतिवेदन यथाशीघ्र सार्वजनिक गर्न माग गर्दै अन्यथा सदन अवरुद्ध गर्ने चेतावनी दिनुभयो ।
उहाँले भन्नुभयो, “जबसम्म लाल आयोगको प्रतिवेदन सार्वजनिक हुँदैन तबसम्म सदन चल्न सक्दैन ।” सांसद चौधरीले प्रतिवेदन सार्वजनिक नगरे सडकमा पनि आन्दोलन गर्न बाध्य हुने चेतावनी दिनुभयो ।
तराई, मधेस र थरुहट लगायतका क्षेत्रमा विभिन्न राजनीतिक दलले गरेको आन्दोलनका क्रममा भएका हिंसा, हत्या, आगजनी, तोडफोड लगायतका घटनाको सत्य–तथ्य छानबिनसम्बन्धी उच्चस्तरीय जाँचबुझ आयोग सर्वोच्च अदालतका पूर्वन्यायाधीश गिरीशचन्द्र लालको नेतृत्वमा गठन भएको थियो ।
टीकापुर घटनाबारे ०७३ असोज ६ गते गठित आयोगले तयार पारेको प्रतिवेदन सार्वजनिक गर्न जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) ले पनि माग गर्दै आएका छन् ।
