काठमाडौं । सोमबार ल्होत्से मलमा यातायात मजदुरहरुले गरेका तोडफोड र लुटपाटमा आठदेखि १० करोड रुपैयाँ बराबरको नोक्सान भएको नेपाल मोबाइल व्यवसायी संघले दाबी गरेको छ ।
सोमबार बेलुकी यातायात मजदुरहरुले काठमाडौंका माछापोखरी र नयाँबसपार्क क्षेत्रमा गरेको प्रदर्शनको क्रममा तीन ठाउँमा मोबाइल पसलमा लुटपाट गरेका थिए ।
ल्होत्से मलमा मोबाइल पसल सन्चालन गरेका व्यवसायी अर्जुन चालिसेले लुटपाट र तोडफोडबाट ८ देखि १० करोड रुपैयाँ बराबरको क्षति भएको बताए । नेपाल मोबाइल व्यवसायी संघका उपाध्यक्ष समेत रहेका चालिसेले मोबाइलको स्टोर रुम, पसल र सर्भिस सेन्टरबाट मोबाइल तथा तिनका पार्टपूर्जा लुटपाट भएको बताएका छन् ।
सामाजिक सन्जालमा सार्वजनिक भएको सीसीटीभी फुटेजमा ल्होत्से मलमा रहेको मोबाइल पसलको सटर खोलेर एक हुल प्रवेश गरी तोडफोड र लुटपाट गरेको दृष्य देखिन्छ ।
प्रहरीलेघटनाबारे अनुसन्धान भईरहेको बताएको छ । मोबाइल व्यवसायीहरुले आज पत्रकार सम्मेलन गरेर घटनाको विस्तृत जानकारी गराउँदैछन् ।
