काठमाडौं । भारतबाट खैरो हेरोइन ल्याएर काठमाडौं उपत्यकामा बिक्री वितरण गर्ने आरोपमा एक भारतीय महिलासहित दुई जना पक्राउ परेका छन्। पक्राउ पर्नेमा लमजुङको बेँसीसहर नगरपालिका–२ का २७ वर्षीय बिक्रम गुरुङ र भारत पश्चिम बंगालकी ५० वर्षीया प्रिया भुजेल रहेका छन्।
लागुऔषध नियन्त्रण ब्यूरो कोटेश्वरका अनुसार भारतको सिलिगुडीबाट काठमाडौं उपत्यकामा खैरो हेरोइन ल्याएर बिक्री वितरण गर्ने समूहबारे आपराधिक गतिविधिको विश्लेषण गर्ने क्रममा प्रहरी टोलीले असोज १३ गते चन्द्रागिरी नगरपालिका–७ सतुङ्गलबाट गुरुङलाई पक्राउ गरेको थियो। उनको साथबाट २८ ग्राम ५०० मिलिग्राम खैरो हेरोइन र ७ लाख रुपैयाँ नगद बरामद भएको थियो।
गुरुङमाथि थप अनुसन्धान गर्ने क्रममा भारतको पश्चिम बंगालबाट काठमाडौंमा खैरो हेरोइन ल्याएर बिक्री वितरणमा संलग्न रहेको आरोपमा भुजेललाई समेत असोज १४ गते चन्द्रागिरी नगरपालिका–१२ बाट पक्राउ गरिएको ब्यूरोले जनाएको छ। उनको साथबाट १८२ ग्राम खैरो हेरोइन बरामद भएको थियो।
प्रहरीका अनुसार दुवै जनाको साथबाट कुल २१० ग्राम ५०० मिलिग्राम खैरो हेरोइन, ७ लाख रुपैयाँ नगद र दुई थान मोबाइल बरामद भएको छ।
ब्यूरोका अनुसार पक्राउ परेका गुरुङ यसअघि पनि लागुऔषध मुद्दामा पक्राउ परेका व्यक्ति हुन्। उनी २०८१ माघ २ गते २९४ ग्राम ३०० मिलिग्राम खैरो हेरोइनसहित पक्राउ परी जगन्नाथ देवल कारागारमा थुनामा रहेका थिए। जेन्जी आन्दोलनका क्रममा उनी कारागारबाट फरार भएको रेकर्डबाट खुलेको ब्यूरोले जनाएको छ।
घटनाबारे थप अनुसन्धान भइरहेको प्रहरीले जनाएको छ।
