काठमाडौं । नेपाली राष्ट्रिय फुटबल टिमका मिडफिल्डर विशाल राई सुरक्षित भविष्यको खोजीमा अष्ट्रेलिया प्रस्थान गरेका छन् ।
‘ए’ डिभिजन लिग नजिकिदै गर्दा राष्ट्रिय टोलीका नियमित सदस्य विशाल अष्ट्रेलियातर्फ लागेका हुन् । उनलाई त्रिभुवन अन्तर्राष्ट्रिय विमानस्थलमा मछिन्द्रका खेलाडीसहितको टोलीले शुक्रबार बिहान बिदाई गरेका छन् ।
विशाल सहिद स्मारक ‘ए’ डिभिजन लिग च्याम्पियन मछिन्द्र फुटबल क्लबका मिडफिल्डर थिए । मछिन्द्रले लगातार दुई पटक लिग जित्दा उनी टिमका मुख्य खेलाडी थिए ।
विशालले नेपालका लागि २८ खेलमा ३ गोल गरेका छन् ।
पछिल्लो समय अखिल नेपाल फुटबल संघ (एन्फा) र ‘ए’ डिभिजन क्लबबीचको विवादका कारण समयमै शीर्ष डिभिजनको लिग हुन नसक्दा ३० भन्दा बढी खेलाडी विदेशिएका छन् । जसमा विशाल राई पनि थपिएका हुन् ।
