एजेन्सी । इंग्लिस प्रिमियर लिग फुटबल अन्तर्गत आर्सनलले जित निकालेको छ । गएराति भएको ‘नर्थ लण्डन डर्बी’मा टोटेनहमलाई आर्सनलले उसकै मैदानमा २-० गोलले पराजित गरेको हो ।
खेलको १४ औं मिनेटमा आर्सनलका बुकायो साकाले प्रहार गरेको बल टोटेनहमका गोलकिपर ह्युगो लोरिसलाई लागेर गोल हुन पुग्यो । यस्तै खेलको ३६ औं मिनेटमा मार्टिन ओडेगार्डले गोल गर्दै आर्सनलको अग्रता दोब्बर पारे । उनलाई बुकायो साकाले पास उपलब्ध गराए । ओडेगार्डले डी बक्स बाहिरबाट उत्कृष्ट गोल गरे ।
दोस्रो हाफमा भने दुबै पक्षबाट कुनै गोल हुन सकेन । जितसँगै आर्सनलले दोस्रो स्थानमा रहेको म्यान्चेस्टर सिटीसँग आठ अंकको अग्रता बनाएको छ । शीर्षस्थानमा कायम रहेको आर्सनलको १८ खेलबाट ४७ अंक छ । पराजित टोटेनहम १९ खेलमा ३३ अंकसहित पाँचौं स्थानमा रहेको छ ।
