पर्सा। प्रहरीले झैझगडामा संलग्न भएको आरोपमा एक जनालाई पक्राउ गरेको छ ।
वीरगञ्ज महानगरपालिका-२ ईदगाहा चोकस्थित भित्री सडकखण्डमा बस्ने १८ वर्षीय समीर अन्सारीले विगतको व्यक्तिगत विवादको विषयमा झैझगडा गरेका भन्दै प्रहरीले निजलाई पक्राउ गरेको हो ।
जिल्ला प्रहरी कार्यालय पर्साका प्रहरी नायब उपरीक्षक चक्रबहादुर मल्लका अनुसार वीरगञ्ज महानगरपालिका-१६ इनरुवागाउँ बस्ने १८ वर्षका रञ्जित यादवलाई हातपात गरी निज यादवको ओठ तथा नाकमा चोट लागि घाइते बनाएकाले अन्सारीलाई नियन्त्रणमा लिई थप अनुसन्धान सुरु गरिएको हो । यादवको प्रभु अस्पतालमा उपचार भइरहेको छ ।
यसैबीच, उक्त घटनामा संलग्न व्यक्तिलाई प्रहरीले नियन्त्रणमा लिई सूक्ष्म अनुसन्धान गरिरहेको अवस्थामा विभिन्न सामाजिक सञ्जाल तथा सञ्चारमाध्यममा सामाजिक सद्भाव बिथोल्ने किसिमका समाचार सम्प्रेषण भइरहेकाबारे गम्भीर ध्यानाकर्षण भएको पनि प्रहरीले जनाएको छ ।
उक्त घटनाका सम्बन्धमा सत्यतथ्य पत्ता लगाइ घटनामा संलग्न व्यक्तिलाई कानुन बमोजिम कारबाही प्रक्रिया अगाडि बढाइसकिएको जनाउँदै प्रहरी नायब उपरीक्षक मल्लाले धार्मिक सद्भाव कायम राखी सही समाचार सम्प्रेषण गर्न र धार्मिक सद्भाव कायम राख्नेतर्फ आवश्यक सहयोग पुर्याउन हुन सबै सञ्चारकर्मीहरू तथा समुदायहरूमा आग्रह गर्नुभयो । रासस
