बैतडी । बैतडीमा १५ शय्याको अस्पताल निर्माणको विषयमा विवाद हुँदा गाउँलेबीच कुटाकुट भएको छ ।
जिल्लाको मेलौली नगरपालिका वडा नम्बर १ र ७ का बासिन्दाबीच भएको झडपमा ३५ जना घाइते भएका छन् । दुबै वडाका स्थानीयले आ-आफ्नो वडामा अस्पताल निर्माण गर्नुपर्ने माग राख्दै आएका थिए । सोही विषयमा विवाद हुँदा बिहीबार साँझ झडप भएको मेलौली नगरपालिकाका प्रमुख भीमबहादुर चन्दले बताए ।
अस्पतालको नाममा वडा नम्बर १ र ७ दुवै स्थानमा जमिन रहेको छ । आफ्नो वडामा अस्पताल बनाउनुपर्ने भन्दै केही समयअघि वडा नम्बर १ का स्थानीयले तालाबन्दी गरेका थिए । त्यसको केही दिनपछि पुनस् वडा नम्बर ७ का स्थानीयले पनि तालाबन्दी गरेका थिए ।
प्रहरीको अनुसार दुवैलाई सहमति गराएर थप प्रक्रिया अघि बढाउने विषयमा छलफल भइरहेका बेला बिहीबार झडप भएको हो । झडपमा वडा नम्बर ७ का २७ र १ का ८ जना घाइते भएका छन् । उनीहरूको अवस्था सामान्य रहेको प्रहरीले बताएको छ ।
२०७० सालदेखि अस्पताल निर्माण हुने भनेपनि स्थानीयहरूको विवादले गर्दा ९ वर्षदेखि निर्माणकार्य अघि बढेको छैन ।
