काठमाडौं । यू-१९ राष्ट्रिय क्रिकेट प्रतियोगितामा सुदुरपश्चिम प्रदेश फाईनल पुगेको छ ।
मुलपानी क्रिकेट मैदानमा भएको समूह चरणअन्तर्गतको अन्तिम खेलमा बागमती प्रदेशलाई ७ विकेटले पराजित गर्दै सुदुरपश्चिम फाईनलमा प्रवेश गरेको हो।
मुलपानी क्रिकेट मैदानमा खराब मौसमका कारण केहि ढिला सुरु भएको खेल ४५ ओभरमा छोट्टयाईएको थियो । खराब मौसमका कारण ४५ ओभरमा छोट्टयाईएको खेलमा बागमतीले सुदुरपश्चिमलाई जितका लागि दिएको १ सय २५ रनको लक्ष्य दिएको थियो ।
सुदुरपश्चिमको जितमा कप्तान अनुराग सिंहले ४४ बलमा ३९ रन बनाए । मिलन बोहोराले ३३ रन जोडे भने गजेन्द्र बोहोराले १९ रन थपे । त्यस्तै, दिपक बोहोराले १७ रन तथा दीपक बोहोराले १० रन बनाए ।
बागमतीको तर्फबाट रोसन विकले २ विकेट लिए भने प्रतिक श्रेष्ठले १ विकेट लिए ।
पहिले ब्याटिङ गरेको बागमतीले भने २८.४ ओभरमा अलआउट हुदै १ सय २४ रन बनाएको थियो । बागमतीका लागि प्रतिक श्रेष्ठले ५० बलमा ४४ रन बनाए भने रोशन विकले ३६ र सक्षम बस्ताकोटीले ३३ रन बनाए ।
सुदुरपश्चिमका बलर आकाश चन्दले ह्याट्रिक सहित ४ विकेट लिएका थिए । चन्दले ५.४ ओभरमा १२ रन खर्चिएर ४ विकेट लिए । त्यस्तै हेमन्त धामीले ३ विकेट लिए भने नरेन साउदले २ विकेट लिए । युवराजले १ विकेट रह्यो ।
सुदुरपश्चिम ६ खेलमा अपराजित रहदै १२ अंकका साथ अंक तालिकाको र्शीष स्थानमा रहेको छ । भने बागमती ६ खेलमा ४ जित र २ हारका साथ ८ अंक सहित अंक तालिकाको तेस्रो स्थानमा रहेको छ । बागमती फाईनलमा पुग्न भने शनिबार हुने खेलमा लुम्बिनीलाई पराजित गर्नुपर्ने हुन्छ ।
