एजेन्सी । फिफा विश्वकप फुटबल अन्तर्गत आयोजक राष्ट्र कतारले पहिलो खेलमै हार ब्यहोरेको छ ।
आइतबार राति सम्पन्न खेलमा कतार इक्वेडरसँग २-० गोलले स्तब्ध बनेको हो । उद्घाटन खेलमा इक्वेडरलाई जित दिलाउन दुबै गोल एनर भ्यालेन्सियाले गरे ।
उनले खेलको १६ औं मिनेटमा पेनाल्टीमार्फत गोल गर्दै इक्वेडरलाई सुरुवाती अग्रता दिलाए । यस्तै, ३१ औं मिनेटमा व्यक्तिगत दोस्रो गोल गर्दै उनले इक्वेडरको अग्रता दोब्बर पारे । उनले हेडरमार्फत गोल गरेका हुन् । त्यसपछि खेलमा थप गोल हुन सकेन ।
खेलको तेस्रो मिनेटमा भ्यालेन्सियाले नै गरेको गोलले मान्यता पाएन । उनी अफसाइड रहे । जितसँगै समूह ए मा इक्वेडरले महत्वपूर्ण तीन अंक बटुल्दै शीर्षस्थानमा रहेको छ ।
