काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले नेकपा (एमाले) का अध्यक्ष केपी शर्मा ओलीले राजावादी गठबन्धनको नेतृत्व गरेको आरोप लगाउनुभएको छ ।
शुक्रबार गोरखामा आयोजित चुनावी सभामा उहाँले अहिलेसम्मको परिवर्तनलाई उल्ट्याउन केपी ओलीले राजावादी गठबन्धनको नेतृत्व गरेको बताउनुभयो ।
एमालेमा केही गोरुगाढावाला प्रवृत्तिका मानिसहरु रहेको भन्दै अध्यक्ष प्रचण्डले संविधानसभामा हस्ताक्षर गरिसकेपछि सुध्रिए होलान् भनेको अहिले देशलाई अराजकतातर्फ लान ढुकेर बसेका रहेछन् भन्नुभयो ।
कम्युनिष्टलाई एकताबद्ध गरेर लैजान आफूहरुले प्रधानमन्त्री र नेताका रुपमा अगाडि सारेका ओली संविधानविरुद्ध नै लागेको उहाँको भनाइ थियो । अहिलेको गठबन्धन लोकतन्त्र र संविधान रक्षाका लागि बनेको उहाँको जिकिर थियो ।
