काठमाडौँ । चुनावी सभालाई सम्बोधन गर्न प्रधानमन्त्री एवं नेपाली कांग्रेसका सभापति शेरबहादुर देउवा डडेल्धुरा पुग्नुभएको छ ।
निर्वाचन आयोगले निर्वाचन आचारसंहिताबमोजिम बिहीबारदेखि उम्मेदवार तथा राजनीतिक दलहरुलाई निर्वाचन प्रयोजनका लागि जुलुस, आमसभा, कोणसभाजस्ता गतिविधि गर्न अनुमति दिएसँगै चुनावी सभालाई सम्बोधन गर्न प्रधानमन्त्री देउवा डडेल्धुरा पुग्नुभएको हो ।
उहाँ डडेल्धुरा निर्वाचन क्षेत्रबाट प्रतिनिधिसभा सदस्यको उम्मेदवारसमेत हुनुहुन्छ । यसअघि प्रधानमन्त्री देउवाले चुनावी सभामा सहभागी हुन निर्वाचन आयोगसमक्ष पत्र लेखी अनुरोध गर्नुभएको थियो ।
आयोगले उहाँलाई सरकारी स्रोत र साधनको प्रयोग नगर्ने र आफ्नै वा पार्टीको खर्चमा सहभागी हुन अनुमति दिएको थियो । त्यसपछि प्रधानमन्त्री देउवा हिजो बुधबार निजी हेलिकप्टरमार्फत धनगढी पुग्नुभएको र निजी निवासमा बस्नुभएको थियो ।
