काठमाडौं । साफ यू–२० च्याम्पियनसिप फुटबल अन्तर्गत नेपालले आज (मंगलबार) लिग चरणको अन्तिम खेल बंगलादेशविरुद्ध खेल्दैछ।
भुवनेश्वरस्थित कालिंगा स्टेडियममा नेपाल र बंगलादेशबीचको खेल नेपाली समय अनुसार दिउँसो ४ः१५ बजे सुरु हुनेछ । बंगलादेशविरुद्धको खेल नेपालका लागि निकै महत्वपूर्ण रहेको छ ।
नेपाललाई फाइनलमा पुग्न बंगलादेशविरुद्ध फराकिलो जित आवश्यक रहेको छ भने अर्कोतर्फ नेपाल भारत र माल्दिभ्सबीचको खेलको नतिजाको प्रतिक्षामा रहनुपर्नेछ ।
आज बंगलादेशलाई ९ गोलको अन्तरले पराजित गरेको खण्डमा नेपालले फाइनलमा स्थान पक्का गर्नेछ । आइतबार भारतसँग ८–० को फराकिलो हारपछि नेपाललाई बंगलादेशविरुद्ध फराकिलो जितको आश्यकता परेको हो । यदि, बंगलादेशसँग बराबरी भएको खण्डमा भने नेपालले भारत र माल्दिभ्सबीचको खेल कुर्नु पर्नेछ ।
अर्कोतर्फ, भारतले माल्दिभ्ससँग हार ब्यहोरेमा नेपालले फाइनलमा स्थान बनाउनेछ भने माल्दिभ्स र भारतबीच बराबरी भएको खण्डमा नेपालले बंगलादेशमाथि झिनो गोलको जितले पनि पुग्नेछ ।
अंक तालिकाको शीर्ष स्थानमा रहेको बंगलादेशविरुद्ध जित निकाल्न नेपाललाई सहज छैन । किनभने बंगलादेश जारी प्रतियोगितामा अपराजित रहने एक्लो टोली समेत हो ।
बंगलादेश ३ खेलमा अपराजित रहदै ९ अंक जोडेर शीर्ष स्थानमा रहेको छ । नेपाल ३ खेलमा ६ अंक जोडेर तेस्रो स्थानमा रहेको छ । हेड टु हेडमा अघि रहेको भारत ३ खेलमै ६ अंक जोडेर दोस्रो स्थानमा रहेको छ । प्रतियोगिताबाट माल्दिभ्स र श्रीलंका भने समान १–१ अंक जोडेर बाहिरिसकेका छन् । ५ राष्ट्र सहभागी च्याम्पियनसिपको शीर्ष दुई टोली उपाधिका लागि भिड्नेछन् ।
