काठमाडौँ । सरकारले निजी अस्पताल तथा मेडिकल कलेजबाट स्वास्थ्य बिमा कार्यक्रम बन्द गरेको छ । चालु आवको बजेटमा सामुदायिक र सरकारी अस्पतालबाट मात्र स्वास्थ्य बिमा कार्यक्रममार्फत सेवा उल्लेख छ । बजेटमा उल्लेख भएको व्यवस्थाबाट निजी अस्पतालबाट स्वास्थ्य बिमा कार्यक्रम बन्द हुने निश्चित भएको हो ।
स्वास्थ्य बिमा बोर्डका अनुसार बजेट वक्तव्य ऐन सरह हुने भएकाले स्वास्थ्य बिमा कार्यक्रम सेवा अब निजी अस्पताल तथा मेडिकल कलेजबाट उपलब्ध हुने छैन ।
बजेटमा ‘स्वास्थ्य बीमा कार्यक्रमलाई थप व्यस्थित र प्रभावकारी बनाउन लाभग्राहीहरुलाई सामुदायिक तथा सरकारी अस्पतालहरुबाट मात्र उक्त सेवा प्रदान गर्ने व्यवस्था मिलाइनेछ’ उल्लेख छ ।
‘यसका लागि सबै सामुदायिक तथा सरकारी अस्पतालहरुमा सामाजिक स्वास्थ्य इकाइ स्थापना गरिनेछ । स्वास्थ्य बीमा कार्यक्रमलाई दिगो बनाउन बीमा कम्पनी मार्फत सञ्चालन गर्न आवश्यक तयारी गरिनेछ’, बजेट वक्तव्यमा उल्लेख छ ।
स्वास्थ्य बीमा कार्यक्रमका लागि सरकारले चालु आर्थिक वर्षका लागि रु ७ अर्ब ५० करोड विनियोजन गरेको छ ।
