काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले आफ्नो र प्रधानमन्त्री शेरबहादुर देउवा पत्नी आरजु देउवाको भारत भ्रमणको उद्देश्य एउटै नभएको बताउनुभएको छ ।
भारत भ्रमणका लागि नयाँ दिल्ली उड्नुअघि त्रिभुवन अन्तर्राष्ट्रिय विमानस्थलमा पत्रकारहरुसँग कुरा गर्दै अध्यक्ष प्रचण्डले आफ्नो भारत भ्रमण राजनीतिक र सद्भावना भ्रमण रहेको बताउनुभयो । उहाँले आफ्नो भारत भ्रमणले भारतसँगको सम्बन्ध सुधारमा सहयोग पुग्ने विश्वास व्यक्त गर्नुभयो ।
प्रधानमन्त्री पत्नी आरजुको भारत भ्रमणको चर्चा चलिरहेको बेला प्रचण्डको आकस्मिक भारत भ्रमण भएको छ । उहाँले यसलाई संयोग मात्र भन्नुभयो । “उहाँको भ्रमणको उद्देश्य र मेरो भ्रमणको उद्देश्य फरक हो, नयाँ दिल्लीमा उहाँ (आरजु) सँग भेट हुनसक्छ, सम्भवतः उहाँ उपचारका लागि जानु भएको होला ।”
पत्रकारहरुसँग अध्यक्ष प्रचण्डले आफूले छिट्टै चीनको पनि भ्रमण गर्ने जानकारी दिनुभयो । भर्खरै नेपाल आएका चिनियाँ कम्युनिष्ट पार्टीको विदेश विभाग प्रमुख लिउ जियान्चाओले आफूलाई चीन भ्रमणको निम्तो दिएको उल्लेख गर्दै उहाँले चीन भ्रमणमा आउँछु भनेर जवाफ दिएको बताउनुभयो ।
माओवादी अध्यक्ष प्रचण्ड तीन दिने भारत भ्रमणका क्रममा आज त्यसतर्फ प्रस्थान गर्न लाग्नुभएको हो ।
