काठमाडौँ । प्रधानमन्त्री निवास बालुवाटारमा सत्ता साझेदार दलहरुको बैठक बसिरहेको छ । बैठकमा ‘संक्रमणकालीन न्यायसम्बन्धी विधेयक’ बारे छलफल भइरहेको बताइएको छ ।
सत्ता साझेदार दलहरुबीच सो विधेयकसम्बन्धमा सहमति जुटेलगत्तै मन्त्रिपरिषद्को बैठक आजै बसेर सो विधेयकलाई पारित गर्ने तयारी गरिएको समाचार छ ।
यसै प्रयोजनका लागि सरकारले आज शुक्रबार दिउँसो १ बजे बस्ने प्रतिनिधिसभाको बैठकमा संक्रमणकालीन न्यायसँग जोडिएको कानूनमा संशोधनको विधेयक पेस गर्ने तयारी गरेको बताइएको ।
विद्यमान बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ अनुसार अहिले द्वन्द्वकालीन घटनाको छानबिन गर्न सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोग गठन गरिएको छ ।
सोसम्बन्धी ऐनअनुसार ती आयोग सञ्चालित भए पनि ऐनमा संशोधन हुनुपर्ने पीडितहरुको माग छ । विसं २०७१ फागुन १४ गते कानून संशोधन गर्न सर्वोच्च अदालतले सरकारका नाममा आदेश दिएको थियो ।
