विराटनगर । मुख्यमन्त्री भीम आचार्यले विश्वासको मत लिने प्रयोजनका लागि आह्वान गरेको प्रदेश १ को प्रदेशसभा बैठक आज (शुक्रबार) दिउँसो बस्दैछ ।
प्रदेशसभाको नवौं तथा हिउँदे अधिवेशनको तेस्रो बैठक दिउँसो १ बजे बस्न लागेको हो ।
मुख्यमन्त्री आचार्यले संसद सचिवालयमा दर्ता गराएको विश्वासको मत सम्बन्धी प्रस्ताव बैठकमा पेस हुने बताइएको छ ।
उक्त प्रस्ताव असोज २५ गते संसद सचिवालयमा दर्ता भएको थियो ।
दल विभाजन भएको एक महिनाभित्र मुख्यमन्त्रीले संसदबाट विश्वासको मत लिनुपर्ने संवैधानिक व्यवस्था अनुसार आचार्यले विश्वासको मत लिन लागेका हुन् । मुख्यमन्त्रीले संसद सचिवालयमा दर्ता गराएको विश्वासको मत सम्बन्धी प्रस्ताव बैठकमा पेस भएपछि छलफलको प्रक्रिया सुरु हुनेछ ।
छलफलपछि विश्वासको मतका लागि मतदानको मिति तय गरिनेछ । स्रोतका अनुसार सभामुख भने मतदाताको मिति केही पर सार्ने तयारीमा रहेको बताइएको छ ।
विपक्षी गठबन्धनले भने आजै मतदान हुनुपर्ने अडान राखेको छ । नेकपा (एकीकृत समाजवादी) गठन भएपछि एमाले नेतृत्वको प्रदेश १ सरकार अल्पमतमा परेको छ । पार्टी विभाजनअघि एमालेसँग ५१ सांसद थिए ।
९२ सदस्यीय प्रदेशसभामा एमालेसँग अहिले ४१ जना मात्रै सांसद छन् । संसदमा बहुमत पुर्याउन ४७ मत आवश्यक पर्छ । विपक्षी गठबन्धनसँग ५० सांसद छन्। मुख्यमन्त्री आचार्यले विश्वासको मत पाउन नसकेमा प्रदेशमा नयाँ सरकार गठनको बाटो खुल्नेछ ।
यद्यपि मुख्यमन्त्री आचार्यले विश्वासको मत लिने भनिएको प्रदेशसभा बैठकअघि बोलाइएको कार्यव्यवस्था परामर्श समितिको बैठक अझै बस्न सकेको छैन । सभामुख प्रदीपकुमार भण्डारीले बिहान साढे १० बजेका लागि बैठक बोलाएका थिए ।
दिउँसो १ बजेका लागि बोलाइएको बैठक सार्ने रणनीतिअनुरूप सभामुखले बैठक नराखेको विपक्षी दलहरुको आरोप छ ।
