काठमाडौं । सार्वजनिक खरिद अनुगमन कार्यालय (पीपीएमओ)को विद्युतीय सरकारी खरिद प्रणाली (ई–जीपी) मा अनधिकृत पहुँच पुर्याई ठेक्काका विवरण हेरफेर गरेको आरोपमा आठ जना पक्राउ परेका छन्।
नेपाल प्रहरीको साइबर ब्यूरोका अनुसार विभिन्न ठेक्काको आर्थिक प्रस्ताव खोल्नुअघि नै आर्थिक प्रस्तावसम्बन्धी कागजात परिवर्तन गरेको सम्बन्धमा प्राप्त निवेदनमाथि प्राविधिक अनुसन्धान तथा विश्लेषण गरिएको थियो।
अनुसन्धानका क्रममा घटनामा संलग्न रहेको खुलेका आठ जनालाई काठमाडौं जिल्ला अदालतबाट पक्राउ अनुमति लिएर साइबर ब्यूरोको टोलीले असोज १६ गते काठमाडौं उपत्यकाका विभिन्न स्थानबाट पक्राउ गरेको हो।
पक्राउ परेकाहरूमाथि विद्युतीय कारोबार ऐन, २०६३ अन्तर्गतको कसुरमा काठमाडौं जिल्ला अदालतबाट म्याद थप गरी थप अनुसन्धान भइरहेको साइबर ब्यूरोले जनाएको छ।
साइबर ब्यूरोले घटनासम्बन्धी थप अनुसन्धान जारी रहेको जनाएको छ।
