काठमाडौं । सरकारले खेलकुद पूर्वाधार विकासलाई उच्च प्राथमिकता दिँदै देशभर २७ वटा खेलमैदान तथा कभर्ड हल निर्माण गर्ने भएको छ ।
सरकारका प्रवक्ता एवं शिक्षा तथा खेलकुदमन्त्री सस्मित पोखरेलले पूर्वाधार विकास मन्त्रालय र राष्ट्रिय खेलकुद परिषद् (राखेप) बीच यससम्बन्धी समझदारीपत्रमा हस्ताक्षर भइसकेको जानकारी दिनुभएको हो ।
सोमबार सिंहदरबारमा आयोजित मन्त्रिपरिषद्को नियमित पत्रकार सम्मेलनमा बोल्दै मन्त्री पोखरेलले प्रारम्भिक चरणमा देशका विभिन्न स्थानमा छनोट गरिएका २७ वटा क्रिकेट तथा फुटबल मैदान र कभर्ड हल निर्माण गरिने बताउनुभयो ।
उहाँका अनुसार लामो समयदेखि अघि बढ्न नसकेका खेलकुद पूर्वाधार निर्माणका आयोजनालाई गति दिन मन्त्रालय र राखेपबीच भएको समझदारीले महत्वपूर्ण भूमिका खेल्नेछ । देशभरका सबै रंगशाला तथा खेलकुद पूर्वाधारलाई एकैपटक स्तरोन्नति गर्न बजेट र प्राविधिक सीमितता रहेकाले प्राथमिकताका आधारमा २७ वटा आयोजनाबाट काम अघि बढाउन लागिएको उहाँले बताउनुभयो ।
मन्त्री पोखरेलले भन्नुभयो, ‘पूर्वाधार विकास मन्त्रालय र राष्ट्रिय खेलकुद परिषद्बीच हालै एमओयू भएको छ । त्यसअन्तर्गत देशभर २७ वटा क्रिकेट तथा फुटबल मैदान र कभर्ड हल निर्माण गर्ने योजना अघि बढाइएको छ । देशभरका सबै खेल पूर्वाधार एकैपटक निर्माण गर्न सम्भव नभए पनि २७ वटा आयोजनाबाट सुरु गर्नु महत्वपूर्ण सुरुवात हो ।’
सरकारले २७ वटा आयोजनाबाट क्षेत्रीय तथा स्थानीय स्तरमा खेलकुद गतिविधिको विस्तार र खेलाडी उत्पादनमा टेवा पुग्ने अपेक्षा गरेको छ । छनोट भएका स्थानमा तत्काल निर्माण कार्य अघि बढाउन सम्बन्धित निकायलाई निर्देशन दिइसकेको मन्त्री पोखरेलले जानकारी दिनुभयो ।
उहाँले आगामी दिनमा खेलकुद पूर्वाधारमा थप लगानी विस्तार गर्दै जाने सरकारको नीति रहेको समेत स्पष्ट पार्नुभयो ।
