काठमाडौं । पोर्चुगलमा रहेका नेपाली समुदायलाई आवश्यक सूचना, सेवा, सहयोग तथा परामर्श उपलब्ध गराउने उद्देश्यले गैरआवासीय नेपाली संघ (एनआरएनए) राष्ट्रिय समन्वय परिषद् पोर्चुगलले राजधानी लिस्बोनमा आफ्नो कार्यालय सञ्चालनमा ल्याएको छ ।

पोर्चुगलमा नेपालीको संख्या तीव्र रूपमा बढिरहेका बेला समुदायलाई प्रत्यक्ष रूपमा सेवा उपलब्ध गराउन कार्यालय सञ्चालनमा ल्याइएको एनआरएनए पोर्चुगलले जनाएको छ । कार्यालयबाट नेपाली समुदायका समस्या, जिज्ञासा तथा आवश्यकताका विषयमा सूचना, परामर्श र सहजीकरण उपलब्ध गराइने संघको भनाइ छ ।

एनआरएनए पोर्चुगलका अध्यक्ष सुजन लामा मोक्तानले पोर्चुगलमा नेपालीको संख्या बढेसँगै समुदायलाई संस्थागत रूपमा सेवा दिन कार्यालयको आवश्यकता महसुस भएकाले कार्यालय सञ्चालनमा ल्याइएको बताए । उनका अनुसार कार्यालयबाट नेपालीका दैनिक समस्या, कागजी प्रक्रिया, संस्थागत समन्वय तथा आवश्यक सूचना र सहयोगका विषयमा सहजीकरण गरिनेछ ।

अध्यक्ष मोक्तानले पोर्चुगलमा रहेका नेपाली समुदायलाई कार्यालयलाई आफ्नो साझा सम्पर्कस्थलका रूपमा उपयोग गर्न आग्रह गरे । संघले उपलब्ध गराउने सेवा तथा सहयोगलाई थप व्यवस्थित र सहज बनाउने उद्देश्य रहेको उनको भनाइ छ ।

त्यस्तै, एनआरएनए पोर्चुगलका सचिव सुरज भण्डारीले कार्यालयसँगै संघले आधिकारिक वेबसाइटसमेत सञ्चालनमा ल्याएको जानकारी दिए । उनका अनुसार वेबसाइटमार्फत संघका गतिविधि, सूचना, कार्यक्रम तथा उपलब्ध सेवाबारे जानकारी लिन सकिनेछ ।

सचिव भण्डारीले नेपाली समुदायका जिज्ञासा तथा सेवा र सहयोगसम्बन्धी अनुरोध पनि वेबसाइटमार्फत पठाउन सकिने व्यवस्था गरिएको बताए । कार्यालय र वेबसाइटलाई नेपाली समुदायसँगको प्रत्यक्ष सम्पर्क तथा सूचना आदानप्रदानको माध्यमका रूपमा विकास गर्ने योजना रहेको उनले बताए ।

पोर्चुगलको राष्ट्रिय तथ्याङ्क संस्थान (AIMA) का अनुसार सन् २०२५ मा पोर्चुगलमा नेपाली नागरिकको संख्या ५६ हजार 3 सय 4 पुगेको छ । यो पोर्चुगलमा रहेका आप्रवासीमध्ये पाँचौँ ठूलो संख्या हो ।
सन् २०२१ मा पोर्चुगलमा २४ हजार १३ जना नेपाली रहेकोमा चार वर्षमा नेपालीको संख्या १३६ दशमलव ८ प्रतिशतले बढेर ५६ हजार ८ सय ६६ पुगेको हो । चार वर्षको अवधिमा मात्रै ३२ हजार ८ सय ५३ नेपाली थपिएका छन् ।

सन् २०२५ मा पोर्चुगलमा रहेका कुल आप्रवासीको संख्या १५ लाख ९७ हजार ५ सय ३९ रहेकोमा नेपालीको हिस्सा ३ दशमलव ५५ प्रतिशत रहेको छ । नेपालीको संख्या बढेसँगै पोर्चुगलमा नेपाली संघसंस्थाको संस्थागत उपस्थिति र नेपालको कूटनीतिक सक्रियता पनि विस्तार हुँदै आएको छ ।

नेपाल सरकारले २०८१ सालमा लिस्बोनमा नेपाली दूतावास स्थापना गरेको थियो । सरकारले प्रकाशमणि पौडेललाई पोर्चुगलका लागि नेपाली राजदूत नियुक्त गरेको थियो ।

यता, पोर्चुगलले पनि नेपालमा आफ्नो कूटनीतिक उपस्थिति विस्तार गर्ने प्रक्रिया अघि बढाएको छ । पोर्चुगलले काठमाडौंमा काउन्सिलर कार्यालय स्थापना गर्न अनुमति मागेपछि नेपाल सरकारले २०८३ साउन २६ गते त्यसका लागि सहमति दिने निर्णय गरेको थियो । त्यसपछि पोर्चुगलले काउन्सिलर कार्यालयभन्दा माथिल्लो तहको महावाणिज्य दूतावास स्थापना गर्न अनुमति मागेको जनाइएको छ ।

लिस्बोनमा सञ्चालनमा आएको एनआरएनए पोर्चुगलको कार्यालय अभेनिदा देफेन्सोरेस दे शाभेस नं. ४, १०००–१०९ मा रहेको छ । कार्यालय एसआईसीको अगाडि रहेको संघले जनाएको छ ।

नेपाली समुदायको संख्या निरन्तर बढिरहेको अवस्थामा कार्यालय सञ्चालनमा आएपछि पोर्चुगलमा रहेका नेपालीलाई सेवा, सूचना तथा आवश्यक सहयोगमा सहज पहुँच पुग्ने अपेक्षा एनआरएनए पोर्चुगलले गरेको छ ।