न्युज एजेन्सी नेपालसँगको कुराकानीमा अध्यक्ष शाहले भोटेकोशी करिडोरमा विपत्ति आए पनि काठमाडौं, चितवन, पोखरालगायतका प्रमुख पर्यटकीय गन्तव्य सामान्य अवस्थामा रहेको जानकारी अन्तर्राष्ट्रिय बजारमा पुर्याउनुपर्ने बताउनुभयो ।
उहाँले भारत र चीनलगायत प्रमुख पर्यटकीय बजारमा दशैँ–तिहारको पर्यटकीय सिजनअघि नै प्रवद्र्धनात्मक कार्यक्रम सञ्चालन गर्नुपर्नेमा जोड दिनुभयो । नेपाल पर्यटन बोर्ड, विदेशस्थित नेपाली दूतावास र निजी क्षेत्रबीच सहकार्य गरी प्रवद्र्धन अभियानलाई तीव्रता दिनुपर्ने उहाँको भनाइ छ ।
‘भोटेकोशीको करिडोरमा विपत्ति भएको हो, नेपालभरि होइन । काठमाडौं, चितवन, पोखरालगायतका पर्यटकीय गन्तव्य सामान्य अवस्थामा छन् भन्ने सन्देश हामीले प्रभावकारी रूपमा दिनुपर्छ,’ अध्यक्ष शाहले भन्नुभयो ।
उहाँका अनुसार नेपाल आउने अधिकांश पर्यटक पदयात्रा, पर्वतारोहण र र्याफ्टिङजस्ता साहसिक पर्यटनमा आकर्षित हुने भएकाले उनीहरू जोखिमबारे जानकार हुन्छन् । त्यसैले प्राकृतिक विपत्तिको वास्तविक अवस्थाबारे सही सूचना अन्तर्राष्ट्रिय बजारमा पुर्याउन सके समग्र नेपालको पर्यटन क्षेत्रमा पर्ने असर न्यून गर्न सकिने उहाँले बताउनुभयो ।
अध्यक्ष शाहले भूकम्प र कोभिड महामारीका समयमा समेत नेपाली पर्यटन क्षेत्रले चुनौती सामना गरेर पुनरुत्थान गरेको स्मरण गर्दै यसपटक पनि सरकार र निजी क्षेत्रबीच समन्वय गरी योजनाबद्ध रूपमा अघि बढ्नुपर्ने धारणा राख्नुभयो ।
अन्तर्राष्ट्रिय एयरलाइन्सको सञ्जाल प्रयोग गर्न सुझाव
शाहले नेपालको पर्यटन प्रवद्र्धनका लागि अन्तर्राष्ट्रिय एयरलाइन्सहरूको विश्वव्यापी सञ्जालसमेत उपयोग गर्नुपर्ने बताउनुभयो । टर्किस एयरलाइन्स, सिंगापुर एयरलाइन्स, क्याथे प्यासिफिक र कतार एयरवेजलगायतका विमान कम्पनीसँग सहकार्य गरी नेपाल भ्रमणसम्बन्धी सकारात्मक सन्देश विश्व बजारमा पुर्याउनुपर्ने उहाँको सुझाव छ ।
नेपालमा पर्यटकको आगमन बढ्दा एयरलाइन्सको व्यवसायसमेत विस्तार हुने भएकाले पर्यटन प्रवद्र्धनमा उनीहरूको सहकार्य प्रभावकारी हुने उहाँले बताउनुभयो । पोखरामा सेप्टेम्बर २३ देखि फ्लाई दुबईले दैनिक उडान सुरु गरेकाले त्यसले पनि नेपालको पर्यटन सामान्य अवस्थामा फर्किरहेको सकारात्मक सन्देश प्रवाह गरेको उहाँको भनाइ छ ।
विपद्पछिको पर्यटन पुनरुत्थानका लागि राष्ट्रिय तथा अन्तर्राष्ट्रिय साझेदार, नेपाललाई सहयोग गर्न इच्छुक संघसंस्था तथा व्यक्तिहरूलाई समेटेर स्पष्ट कार्ययोजनासहित अघि बढ्नुपर्ने अध्यक्ष शाहले बताउनुभयो ।
उहाँले दशैँ–तिहारको मुख्य पर्यटकीय सिजनमा हुनसक्ने आर्थिक क्षति न्यूनीकरण गर्न तत्काल प्रवद्र्धन, प्रभावकारी सूचना सम्प्रेषण र समन्वित कार्ययोजनालाई प्राथमिकता दिनुपर्नेमा जोड दिनुभयो । पछिल्लो समय पर्यटकका बुकिङ रद्द हुने क्रम घट्दै गएको पनि उहाँले जानकारी दिनुभयो ।
होटल संघले आफ्ना अन्तर्राष्ट्रिय सम्पर्क तथा ट्राभल एजेन्टमार्फत ‘नेपाल कलिङ, नेपाल नाउ’ अभियान सञ्चालन गर्दै नेपाल सुरक्षित र उपयुक्त पर्यटकीय गन्तव्य रहेको सन्देश प्रवाह गरिरहेको अध्यक्ष शाहले बताउनुभयो ।
उहाँले पर्यटन व्यवसायी, होटल कर्मचारी तथा विपद्बाट प्रभावित व्यवसायीलाई राहत उपलब्ध गराउन सरकारसँग आग्रहसमेत गर्नुभयो।
