काठमाडौं । अविरल वर्षाका कारण नारायणी नदीमा आएको उच्च बहावले नवलपुरको जनजीवन प्रभावित बनेको छ । बाढीका कारण सुस्ता गाउँसहित विभिन्न क्षेत्र डुबानमा परेपछि ११ सयभन्दा बढी नागरिक विस्थापित भएका छन् ।
प्रतिनिधि सभाको सोमवारको बैठकमा राष्ट्रिय स्वतन्त्र पार्टीका सांसद मनिष खनालले बाढी प्रभावित क्षेत्रमा तत्काल राहत उपलब्ध गराउन तथा क्षतिग्रस्त भौतिक संरचनाको पुनर्निर्माणका लागि सरकारको ध्यानाकर्षण गराउनुभएको छ ।
उहाँले नारायणी नदीको बहाव बढ्दा अमलटारी, सेरी, तमासपुर र बहुवन क्षेत्र उच्च जोखिममा परेको तथा सिङ्गो सुस्ता गाउँ डुबानमा परेको जानकारी दिनुभयो । स्थानीय प्रशासनले २३५ घरधुरीका करिब ११ सय नागरिकलाई सुरक्षित स्थानमा स्थानान्तरण गरे पनि पानीको सतह घटिसक्दा समेत विस्थापितहरू तत्काल घर फर्कने अवस्था नरहेको उहाँले बताउनुभयो ।
सांसद खनालले नदी तटीय क्षेत्रमा बाढी र डुबानबाट भएको क्षतिको गम्भीर समीक्षा गरी सरकारले तत्काल राहतको प्याकेज घोषणा गर्नुपर्ने बताउनुभयो । दीर्घकालीन समाधानका लागि विगतमा सिँचाइ तथा जलस्रोत व्यवस्थापन आयोजनाले तयार पारेको कटान नियन्त्रणसम्बन्धी अध्ययन प्रतिवेदन झिकाएर कार्यान्वयन गर्नुपर्ने उहाँको भनाइ थियो ।
बाढीका कारण कालीगण्डकी करिडोरमा समेत क्षति पुगेको र बौदीकाली गाउँपालिका जोड्ने झोलुङ्गे तथा पक्की पुलमा क्षति हुँदा नागरिकको आवतजावत प्रभावित भएको खनालले बताउनुभयो । बौदीकाली–४, ऋचाङको मौलाथरमा गएको पहिरोबाट भएको क्षतिप्रति पनि उहाँले सरकारको ध्यानाकर्षण गराउनुभयो ।
बाढी तथा पहिरोबाट प्रभावित क्षेत्रमा थप क्षति हुन नदिन पूर्वतयारीका साथै विस्तृत अध्ययन गरी दीर्घकालीन समाधान खोज्नुपर्नेमा सांसद खनालले जोड दिनुभयो।
