काठमाडाैँ । सरकारले तिर्न बाँकी कुल सार्वजनिक ऋणको दायित्व २९ खर्ब ७३ अर्ब पाँच करोड ९२ लाख रुपैयाँ पुगेको छ । सार्वजनिक ऋण व्यवस्थापन कार्यालयका अनुसार गत भदौ मसान्तसम्ममा सरकारको कुल सार्वजनिक ऋण दायित्व मुलुकको कुल गार्हस्थ्य उत्पादन (जिडिपी) को ४५ प्रतिशत नाघेको हो ।
कार्यालयका अनुसार कुल सार्वजनिक ऋणमध्ये आन्तरिकतर्फ १३ खर्ब ६१ अर्ब ८७ लाख रुपैयाँ र बाह्यतर्फ १६ खर्ब ११ अर्ब १८ करोड ८३ लाख रुपैयाँ दायित्व रहेको छ । जिडिपीका आधारमा आन्तरिक ऋण दायित्व २० दशमलव ६३ प्रतिशत र बाह्य ऋण दायित्व २४ दशमलव ४१ प्रतिशत रहेको छ ।
चालु आर्थिक वर्षमा सरकारले ६ खर्ब ५८ अर्ब २८ करोड रुपैयाँ सार्वजनिक ऋण परिचालन गर्ने लक्ष्य राखेको छ । त्यसमध्ये भदौ मसान्तसम्ममा ६१ अर्ब पाँच करोड रुपैयाँ ऋण प्राप्त भइसकेको छ । यो वार्षिक लक्ष्यको ९ दशमलव २८ प्रतिशत हो ।
सरकारले चालु आर्थिक वर्षमा आन्तरिकतर्फ चार खर्ब १० अर्ब र बाह्यतर्फ दुई खर्ब ४८ अर्ब २८ लाख रुपैयाँ ऋण उठाउने लक्ष्य लिएको छ । भदौ मसान्तसम्ममा आन्तरिकतर्फ ५० अर्ब र बाह्यतर्फ ११ अर्ब पाँच करोड रुपैयाँ ऋण उठाइएको कार्यालयले जनाएको छ ।
यस अवधिमा सरकारले सार्वजनिक ऋणको साँवा तथा ब्याज भुक्तानीमा पनि ठूलो रकम खर्च गरेको छ । चालु आर्थिक वर्षमा सरकारी ऋणको साँवा तथा ब्याज भुक्तानीका लागि चार खर्ब १७ अर्ब ८८ करोड रुपैयाँ बजेट विनियोजन गरिएको छ ।
भदौ मसान्तसम्ममा ऋणको साँवा तथा ब्याज भुक्तानीमा ८५ अर्ब एक करोड छ लाख रुपैयाँ खर्च भइसकेको छ । यो वार्षिक बजेट विनियोजनको २० दशमलव ३४ प्रतिशत हो । कुल गार्हस्थ्य उत्पादनका आधारमा भदौ मसान्तसम्ममा कुल ऋण सेवा खर्च १ दशमलव २९ प्रतिशत रहेको कार्यालयले जनाएको छ ।
