काठमाडौं । मुस्ताङ भन्सार कार्यालयले कोरलानाका हुँदै पैठारी भएका मालवस्तुबाट २० दिनमा रु दुई अर्ब ५४ करोड ९३ लाख राजस्व सङ्कलन गरेको छ ।
रसुवाको भोटेकोशीमा आएको विनाशकारी बाढीका कारण रसुवागढी–केरुङ नाका पूर्ण रूपमा बन्द भएपछि चीनबाट नेपाल भित्रिने अधिकांश मालवस्तु तथा विद्युतीय सवारीसाधन कोरलानाका हुँदै आयात हुन थालेका हुन् ।
मुस्ताङ भन्सार कार्यालयका प्रमुख विदुर चुडालका अनुसार भदौ १० गतेपछि कोरलानाका हुँदै नेपाल भित्रिएका ५६४ कन्टेनर र एक हजार ९० विद्युतीय सवारीसाधनको भन्सार जाँचपास भएको छ । केरुङ नाकाबाट मार्ग परिवर्तन भएर आएका मालवस्तु तथा कोरलानाकाबाट नियमित आयात हुने वस्तुका कारण छोटो अवधिमै ठूलो परिमाणमा राजस्व सङ्कलन भएको उहाँले बताउनुभयो ।
रसुवागढी र तातोपानी नाका बन्द रहेकाले चीनबाट हुने आयातका लागि कोरलानाका अहिले प्रमुख वैकल्पिक मार्ग बनेको छ ।
रसुवागढी नाका बन्द हुनुअघि चालु आर्थिक वर्षको साउन र भदौ ९ गतेसम्म मुस्ताङ भन्सार कार्यालयले रु ५३ लाख मात्र राजस्व सङ्कलन गरेको थियो । उक्त ४० दिनको अवधिमा कोरलानाका हुँदै १६३ विद्युतीय सवारीसाधन र १३३ मालवस्तुका कन्टेनर नेपाल भित्रिएका थिए ।
मुस्ताङ भन्सार कार्यालयका अनुसार चालु आर्थिक वर्षको साउन र भदौमा गरी कुल रु तीन अर्ब सात करोड ९३ लाख राजस्व सङ्कलन भएको छ । साउनमा रु २६ करोड ३९ लाख र भदौमा रु दुई अर्ब ८१ करोड ५४ लाख राजस्व सङ्कलन भएको हो ।
साउनमा कोरलानाका हुँदै १०० विद्युतीय सवारीसाधन नेपाल भित्रिँदा रु १७ करोड ३४ लाख राजस्व सङ्कलन भएको थियो । भदौमा भने एक हजार २५३ विद्युतीय सवारीसाधन नेपाल भित्रिँदा रु एक अर्ब ९३ करोड ९७ लाख राजस्व सङ्कलन भएको भन्सार प्रमुख चुडालले बताउनुभयो ।
त्यसैगरी साउनमा ५७ र भदौमा ६९७ मालवस्तुका कन्टेनर कोरलानाका हुँदै नेपाल भित्रिएका छन् ।
गत आर्थिक वर्ष २०८२/८३ मा मुस्ताङ भन्सार कार्यालयले रु छ अर्ब ९२ करोड राजस्व सङ्कलन गरेको थियो । उक्त वर्ष कोरलानाका हुँदै तीन हजार २२३ विद्युतीय सवारीसाधन नेपाल भित्रिएका थिए।
