काठमाडौं:नेपाल भलिबल लिग (एनभीएल) सिजन–१ को उपाधि विजेता अन्नपूर्ण स्पाइकर किंग्स (ASK) ले आयोजना गरेको ‘गौरवको यात्रा’ ट्रफी टुर अन्नपूर्ण बेस क्याम्प (एबीसी) पुगेर सम्पन्न भएको छ।
ऐतिहासिक उपाधि जितेको खुसी समर्थक तथा सर्वसाधारणसँग साट्ने उद्देश्यले आयोजना गरिएको ट्रफी टुर तीन दिनसम्म विभिन्न स्थान हुँदै अन्नपूर्ण बेस क्याम्प पुगेको हो। ट्रफीलाई सेप्टेम्बर २१ (आइतबार) हेलिकप्टरमार्फत समुद्री सतहबाट ४ हजार १३० मिटर उचाइमा रहेको अन्नपूर्ण बेस क्याम्प पुर्याइएको थियो।
किंग्सका गण्डकी संयोजक पोषण मणि त्रिपाठीको समन्वयमा सुरु भएको यात्रा सेप्टेम्बर १९ मा स्याङ्जा, दमौली र भिमाद हुँदै अघि बढेको थियो। सेप्टेम्बर २० मा बागलुङको प्रसिद्ध कालिका मन्दिरको दर्शनपछि पर्वतको कुश्मा हुँदै पोखरा परिक्रमा गरिएको थियो।
ट्रफी टुरको अन्तिम कार्यक्रममा किंग्सकी अध्यक्ष मीना लिम्बु त्रिपाठी, गण्डकी संयोजक पोषण मणि त्रिपाठी, एग्रो थाई फुड्स तथा एक्सट्रिम इनर्जी ड्रिंककी ब्रान्ड हेड प्रतिशा कर्माचार्य र प्रोडक्सन टोलीका प्रितम नेपालीलगायतको सहभागिता थियो।
अन्नपूर्ण बेस क्याम्पमा माछापुच्छ्रे, अन्नपूर्ण साउथ र हिमचुलीलगायत हिमशृङ्खलाको पृष्ठभूमिमा ट्रफी प्रदर्शन गर्दै अन्नपूर्ण हिमालप्रति सम्मान व्यक्त गरिएको थियो।
‘गौरवको यात्रा’ केवल उपाधि उत्सवमा सीमित नभई विभिन्न सामाजिक तथा वातावरणीय सन्देश प्रवाह गर्ने अभियानका रूपमा समेत आयोजना गरिएको किंग्स ले जनाएको छ। यात्रामार्फत ‘गण्डकीको गौरव’, किंग्स रसुवाको साथमा छ’, ‘दुई टोली एक सपना’ र ‘हिमाल र हिमतालहरू बचाऔँ’ भन्ने सन्देश प्रवाह गरिएको थियो।
अभियानले गण्डकी प्रदेशको गौरव, रसुवा बाढीपीडितप्रतिको ऐक्यबद्धता, टोलीबीचको एकता तथा हिमाली वातावरण र हिमताल संरक्षणको सन्देशलाई प्राथमिकता दिएको आयोजकले जनाएको छ।
ट्रफी टुरका क्रममा स्वागत तथा सहभागिता जनाउने समर्थक, स्थानीय बासिन्दा, मन्दिरका भक्तजन, पर्यटन व्यवसायी तथा सहयोगी सबैप्रति ASK ले धन्यवाद व्यक्त गरेको छ।
