हालै नेपालमा आएको विनाशकारी विपद्बाट प्रभावित परिवार तथा समुदायको राहत, पुनःस्थापना र पुनर्निर्माणमा सहयोग पुर्याउने उद्देश्यले उक्त रकम संकलन गरिएको हो।
हाम्रो पात्रो कम्युनिटीका तर्फबाट संकलित रकम अर्थमन्त्री डा. स्वर्णिम वाग्लेलाई औपचारिक रूपमा हस्तान्तरण गरिएको छ। सहयोग रकमसँगै अभियानमा योगदान गर्ने सम्पूर्ण सहयोगीहरूको नामावलीसमेत सरकारलाई बुझाइएको छ।
विदेशमा रहेका नेपालीले समेत सहज रूपमा राष्ट्रिय राहत अभियानमा योगदान गर्न सकून् भन्ने उद्देश्यले हाम्रो पात्रोले अभियान सहजीकरण गरेको जनाएको छ। रकम पठाउँदा कुनै सेवा शुल्क नलिई प्रयोगकर्ताले गरेको सम्पूर्ण योगदान राहत कोषमा पुग्ने व्यवस्था मिलाइएको कम्पनीले जनाएको छ।
हाम्रो पात्रोका संस्थापक तथा प्रमुख कार्यकारी अधिकृत शंकर उप्रेतीले १ करोड २५ लाख रुपैयाँ प्रयोगकर्ताहरूको सामूहिक योगदान भएको बताउनुभयो। उहाँका अनुसार हाम्रो पात्रोले प्रयोगकर्ताको सहयोग सरकारसम्म पुर्याउने माध्यमको भूमिका मात्र खेलेको हो।
उप्रेतीले विपद्का बेला संसारभर रहेका नेपालीले देखाएको एकता, तत्परता र उदारताप्रति आभार व्यक्त गर्दै अभियानमा योगदान गर्ने सबैलाई धन्यवाद दिनुभयो।
हाम्रो पात्रोले स्थापनाकालदेखि सूचना तथा डिजिटल सेवामार्फत नेपाली समुदायलाई जोड्दै आएको जनाएको छ। कम्पनीका अनुसार हाम्रो पात्रो एप विश्वभर २ करोडभन्दा बढी पटक डाउनलोड भइसकेको छ।
कम्पनीले अभियानमा सहभागी सबै प्रयोगकर्ताप्रति कृतज्ञता व्यक्त गर्दै विपद्बाट प्रभावित परिवार तथा समुदायप्रति ऐक्यबद्धता जनाएको छ।
