काठमाडौँ । भोटेकोशी बाढीबाट प्रभावित नागरिकको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा रकम दाखिला गर्ने क्रम बढ्दै गएको छ । विभिन्न स्थानीय तह, संघसंस्था, निजी क्षेत्र तथा व्यक्तिले कोषमा सहयोग रकम जम्मा गरेका हुन् ।
काठमाडौँको ठमेलमा सञ्चालित रमादा होटलले संस्थागत सामाजिक उत्तरदायित्वअन्तर्गत रु ११ लाख ११ हजार १११ सहयोग गरेको छ । होटलका अध्यक्ष जगन्नाथ ज्ञवालीले उक्त रकम कोषमा दाखिला गरिएको जानकारी दिनुभयो ।
स्याङ्जाको पुतलीबजार नगरपालिकाले रु २७ लाख ३९ हजार ८५८ सहयोग गरेको छ । नगरपालिकाका जनप्रतिनिधि तथा कर्मचारीको मासिक तलबबाट रकम सङ्कलन गरी कोषमा दाखिला गरिएको नगर प्रवक्ता मनोज पौडेलले जानकारी दिनुभयो ।
त्यस्तै, वीरगञ्जको मारवाडी ट्रष्ट र चाचान समूहले रु ५२ लाख ११ हजार सङ्कलन गरी राहत कोषमा जम्मा गरेका छन् । चाचान समूहका अध्यक्ष बाबुलाल चाचानले उक्त रकम बाढीपीडितको राहतका लागि सहयोग गरिएको जानकारी दिनुभयो ।
बुटवलस्थित गौतमबुद्ध सामुदायिक अस्पतालले चिकित्सक तथा कर्मचारीबाट सङ्कलित रु ११ लाख ११ हजार १११ राहत कोषमा उपलब्ध गराएको अस्पतालका अध्यक्ष एजाज आलमले जानकारी दिनुभयो ।
बाजुराको बूढीगङ्गा नगरपालिकाले जनप्रतिनिधि, कर्मचारी तथा शिक्षकको मासिक तलबबाट रु २२ लाख ९२ हजार ३३२ सङ्कलन गरी कोषमा सहयोग गरेको नगर प्रमुख रामबहादुर बानियाँले जानकारी दिनुभयो ।
मकवानपुरको भीमफेदी गाउँपालिकाले जनप्रतिनिधि तथा कर्मचारीको मासिक तलबबाट रु पाँच लाख सङ्कलन गरी राहत कोषमा जम्मा गरेको गाउँपालिकाका अध्यक्ष हिदम लामाले बताउनुभयो ।
नेपाली कांग्रेस बनेपा नगर समितिले पार्टीका नेता, कार्यकर्ता तथा शुभेच्छुकबाट सङ्कलित रु दुई लाख २३ हजार ३६४ राहत कोषमा दाखिला गरेको नगर सभापति महेशकुमार कर्माचार्यले जानकारी दिनुभयो । लमजुङको बेँसीसहर नगरपालिकाले पनि जनप्रतिनिधि तथा कर्मचारीको मासिक तलबबाट रु पाँच लाख कोषमा सहयोग गरेको नगर प्रमुख गुमानसिंह अर्यालले जानकारी दिनुभयो ।
काभ्रेपलाञ्चोकका नौ स्थानीय तहले भोटेकोशी बाढीपीडितको राहत, उद्धार तथा पुनःस्थापनाका लागि कुल रु एक करोड ७७ लाख प्रधानमन्त्री दैवी प्रकोप उद्धार कोषमा जम्मा गरेका छन् । भुम्लु गाउँपालिकाले रु ३० लाख, नमोबुद्ध नगरपालिकाले रु २७ लाख ५० हजार, बनेपा नगरपालिकाले रु १५ लाख र पनौती नगरपालिकाले रु ३० लाख सहयोग गरेका छन् । पाँचखाल, धुलिखेल, रोशी र चौँरीदेउराली स्थानीय तहले रु १०–१० लाखका दरले सहयोग गरेका छन् ।
यसैगरी, काभ्रेपलाञ्चोकको धुलिखेल नगरपालिका–११ निवासी रवि धितालले अर्थमन्त्री डा. स्वर्णिम वाग्लेमार्फत प्रधानमन्त्री राहत कोषमा व्यक्तिगत रूपमा रु एक करोड ११ लाख ११ हजार १११ सहयोग गर्नुभएको छ ।
सिरहाको लहान नगरपालिकाले पनि जनप्रतिनिधि, कर्मचारी, शिक्षक तथा स्वास्थ्यकर्मीको मासिक तलबबाट सङ्कलित रु ११ लाख राहत कोषमा दाखिला गरेको नगर प्रमुख महेशप्रसाद चौधरीले जानकारी दिनुभयो ।
भोटेकोशी बाढीबाट प्रभावित क्षेत्रमा तत्काल राहत तथा उद्धारसँगै क्षतिग्रस्त संरचनाको पुनःस्थापना र पुनर्निर्माणका लागि आवश्यक स्रोत जुटाउन प्रधानमन्त्री दैवी प्रकोप उद्धार कोषमा विभिन्न क्षेत्रबाट सहयोग आउने क्रम जारी रहेको छ।
