काठमाडाैँ । महोत्तरीको रामगोपालपुर नगरपालिकाले रसुवा बाढी प्रभावितको राहत, उद्धार तथा पुनःस्थापनाका लागि रु ३१ लाख ३५ हजार १३४ सहयोग गर्ने निर्णय गरेको छ ।
नगरपालिकाले उक्त रकम प्रधानमन्त्री दैवी प्रकोप उद्धार कोषमा दाखिला गर्ने निर्णय गरेको नगरप्रमुख रामदुलार साहले जानकारी दिनुभयो । उहाँका अनुसार सहयोग रकम नगरपालिकाको आन्तरिक स्रोत, जनप्रतिनिधि, कर्मचारी तथा सामुदायिक विद्यालयका शिक्षकको योगदानबाट जुटाइएको हो ।
“राहतका लागि नगर बजेटको आन्तरिक स्रोत, जनप्रतिनिधि, कर्मचारी र सामुदायिक विद्यालयका शिक्षकको योगदान रहेको छ,” नगरप्रमुख साहले भन्नुभयो, “यस्ता विपद्मा मन खोलेर सहयोग गर्न सबै पक्षसँग अपिल गरेका छौँ ।”
यसअघि महोत्तरीका गौशाला, बर्दिबास, भङ्गाहा, औरही र मटिहानी नगरपालिकाले बाढी प्रभावितको सहयोगका लागि प्रधानमन्त्री दैवी प्रकोप उद्धार कोषमा रु ४७ लाख ५० हजार पठाइसकेका छन् ।
महोत्तरीमा १० नगरपालिका र पाँच गाउँपालिका गरी १५ स्थानीय तह रहेका छन् ।
