काठमाडौँ । उज्यालो नेपाल पार्टीका अध्यक्ष कुलमान घिसिङले प्रधानमन्त्री बालेन्द्र साहसँग भेट गरी मुलुकको विद्यमान विपद् व्यवस्थापन, उद्धार कार्य तथा पूर्वाधार विकासका विषयमा सुझाव दिनुभएको छ ।
बिहीबार प्रधानमन्त्री तथा मन्त्रिपरिषद्को कार्यालय सिंहदरबारमा भएको भेटवार्तामा अध्यक्ष घिसिङले भोटेकोशी बाढीबाट सिर्जित समस्या समाधान तथा दीर्घकालीन पूर्वाधार सुरक्षाका विषयमा लिखित र मौखिक सुझाव प्रस्तुत गर्नुभएको हो ।
भेटका क्रममा उहाँले संकटको समयमा उद्धार, राहत र पुनःस्थापनाका कार्यलाई एकीकृत रूपमा अघि बढाउन सरकारको ध्यानाकर्षण गराउनुभयो । विशेषगरी बाढी तथा पहिरोका कारण सुरुङभित्र फसेका नागरिकको उद्धारका लागि आवश्यक प्रविधि र उपकरण तत्काल परिचालन गर्नुपर्नेमा उहाँले जोड दिनुभयो ।
घिसिङले भौगोलिक विकटताका कारण उपकरण पुर्याउन कठिन भएका स्थानमा हेलिकोप्टरमार्फत हेभी इक्युपमेन्ट ढुवानी गरेर भए पनि उद्धार तथा पुनःस्थापनाको कामलाई तीव्रता दिनुपर्ने बताउनुभयो ।
सडक सञ्जाल पुनःस्थापनाका विषयमा उहाँले स्याफ्रुबेँसीलगायतका क्षेत्रमा अवरुद्ध सडक तत्काल सञ्चालनमा ल्याउन तथा रणनीतिक स्थानमा बेलिब्रिज निर्माण गर्न सुझाव दिनुभयो ।
ऊर्जा क्षेत्रमा भएको क्षतिप्रति चिन्ता व्यक्त गर्दै घिसिङले क्षतिग्रस्त जलविद्युत् आयोजनालाई शीघ्र सञ्चालनमा ल्याउन सरकारले विशेष प्याकेज ल्याउनुपर्ने बताउनुभयो । उहाँका अनुसार विपद्का कारण करिब २३५ मेगावाट क्षमताका जलविद्युत् आयोजना प्रभावित भएका छन् ।
घिसिङले निजी क्षेत्रका प्रवर्द्धकलाई प्रोत्साहन गर्ने तथा बीमा भुक्तानी प्रक्रिया सहज बनाउन सरकारले नीतिगत सहजीकरण गर्नुपर्ने बताउनुभयो । दीर्घकालीन सुरक्षाका लागि जलविद्युत् आयोजनाको डिजाइन पुनरावलोकन गर्नुपर्ने र नदी बेसिन व्यवस्थापनमा विशेष ध्यान दिनुपर्ने उहाँको सुझाव थियो ।
त्यस्तै, जोखिम विश्लेषण गरेर मात्र नदी किनारमा सडक तथा अन्य संरचना निर्माण गर्नुपर्नेमा पनि घिसिङले जोड दिनुभयो ।
प्रधानमन्त्री साहले घिसिङले प्रस्तुत गरेका सुझावलाई सकारात्मक रूपमा लिँदै विपद् व्यवस्थापन तथा पूर्वाधार निर्माणमा विज्ञहरूको सल्लाहअनुसार प्रभावकारी कदम चाल्ने आश्वासन दिनुभएको छ ।
